“আমেৰিকাৰ পাছতেই বিশ্বৰ ছুপাৰ পাৱাৰ হোৱাৰ দিশে ভাৰত”—শিৱসাগৰত বেৰিষ্টাৰ ইলিয়াছ হুছেইন আনচাৰী : নৰ্থ ইষ্ট ফাউণ্ডেশ্যনৰ উদ্যোগত জয়সাগৰত বানাক্ৰান্ত অঞ্চলৰ মেধাৱী ছাত্ৰ-ছাত্ৰীক জলপানি প্ৰদান : আনচাৰী ফাউণ্ডেশ্যনৰ উদ্যোগত শিৱসাগৰ, চৰাইদেউ আৰু যোৰহাটৰ বানপীড়িত শিক্ষাৰ্থীলৈ নগদ ধনসহ আৰ্থিক সহায়

শিৱসাগৰ, ৪ ছেপ্টেম্বৰ : শিৱসাগৰৰ নৰ্থ ইষ্ট ফাউণ্ডেশ্যনৰ উদ্যোগত শুকুৰবাৰে জয়সাগৰ তিনিআলিত বানাক্ৰান্ত অঞ্চলৰ মেধাৱী ছাত্ৰ-ছাত্ৰীসকলৰ বাবে এক বিশেষ জলপানি বিতৰণ অনুষ্ঠান অনুষ্ঠিত হয়। অনুষ্ঠানটোত দেশৰ আগশাৰীৰ স্বেচ্ছাসেৱী সংগঠন আনচাৰী ফাউণ্ডেশ্যনৰ স্বত্বাধিকাৰী তথা অসম সন্তান বেৰিষ্টাৰ ইলিয়াছ হুছেইন আনচাৰীয়ে মুখ্য অতিথি হিচাপে অংশগ্ৰহণ কৰে।

অনুষ্ঠানত আনচাৰী ফাউণ্ডেশ্যনৰ তৰফৰ পৰা শিৱসাগৰ, চৰাইদেউ আৰু যোৰহাট জিলাৰ শেহতীয়া বিধ্বংসী বানত ক্ষতিগ্ৰস্ত অঞ্চলৰ নিৰ্বাচিত মেধাৱী ছাত্ৰ-ছাত্ৰীসকলৰ মাজত নগদ ধনসহ জলপানি বিতৰণ কৰা হয়। বানৰ পাছত শিক্ষাৰ্থীসকলক পুনৰ শিক্ষাৰ মূলসুঁতিলৈ ঘূৰি অহাত উৎসাহ আৰু সহায় আগবঢ়োৱাই এই পদক্ষেপৰ মূল উদ্দেশ্য বুলি উল্লেখ কৰা হয়।

উজনি অসমৰ বানৰ দৃশ্য দেখি লণ্ডনত চকুলো নিগৰিছিল—আনচাৰী

জলপানি বিতৰণ কৰি বেৰিষ্টাৰ ইলিয়াছ হুছেইন আনচাৰীয়ে উজনি অসমৰ শেহতীয়া বিধ্বংসী বানৰ প্ৰসংগ উল্লেখ কৰি কয় যে, অঞ্চলটোৱে সন্মুখীন হোৱা অভূতপূৰ্ব জলপ্ৰলয়ৰ দৃশ্যই তেওঁক গভীৰভাৱে ব্যথিত কৰিছিল।

তেওঁ কয় যে উজনি অসমৰ বান পৰিস্থিতিৰ ভয়াৱহতা দেখি লণ্ডনত থকা অৱস্থাতেই তেওঁৰ চকুলো নিগৰিছিল। বিশেষকৈ বানত বহু ছাত্ৰ-ছাত্ৰীৰ কিতাপ-পত্ৰকে ধৰি বিভিন্ন শৈক্ষিক সামগ্ৰী নষ্ট হোৱাৰ খবৰে তেওঁক গভীৰভাৱে উদ্বিগ্ন কৰি তুলিছিল।

তেওঁৰ মতে, প্ৰাকৃতিক দুৰ্যোগে এটা পৰিয়ালৰ ঘৰ-বাৰী আৰু জীৱিকা ক্ষতিগ্ৰস্ত কৰাৰ লগতে শিশুসকলৰ শিক্ষা আৰু ভৱিষ্যতৰ ওপৰতো দীৰ্ঘম্যাদী প্ৰভাৱ পেলাব পাৰে। সেয়েহে বানৰ পাছত পুনৰ্বাসনৰ ক্ষেত্ৰত শিক্ষাৰ্থীসকলৰ প্ৰয়োজনীয়তাক বিশেষ গুৰুত্ব দিয়াটো অত্যন্ত জৰুৰী।

“নৱপ্ৰজন্মক দেশৰ মানৱ সম্পদ হিচাপে গঢ়ি তুলিব লাগিব”

ইলিয়াছ হুছেইন আনচাৰীয়ে কয় যে ছাত্ৰ-ছাত্ৰীসকল হৈছে দেশৰ ভৱিষ্যৎ আৰু এই নৱপ্ৰজন্মৰ ভৱিষ্যৎ সুৰক্ষিত কৰাৰ দায়িত্ব সমাজ তথা অভিভাৱকসকলৰ।

তেওঁ শিক্ষাৰ্থীসকলক ড° এ পি জে আব্দুল কালাম, মহাত্মা গান্ধী আৰু জৱাহৰলাল নেহৰুৰ দৰে বিশিষ্ট ব্যক্তিত্বৰ জীৱন আৰু অৱদানৰ পৰা অনুপ্ৰেৰণা গ্ৰহণ কৰিবলৈ আহ্বান জনায়। লগতে তেওঁ কয় যে আজিৰ শিক্ষাৰ্থীসকলৰ মাজৰ পৰাই ভৱিষ্যতে বিজ্ঞানী, চিকিৎসক, অভিযন্তা, ৰাজনীতিবিদ, সমাজসেৱক, সাংবাদিককে ধৰি বিভিন্ন ক্ষেত্ৰৰ দক্ষ ব্যক্তি ওলাই আহি দেশৰ উন্নয়নত নেতৃত্ব দিব।

তেওঁৰ মতে, কেৱল ব্যক্তিগত সফলতা অৰ্জন কৰাই শিক্ষাৰ লক্ষ্য হ’ব নালাগে; শিক্ষাৰ্থীসকলক দেশ আৰু সমাজৰ বাবে মূল্যৱান মানৱ সম্পদ হিচাপে গঢ়ি তোলাটোও সমানে গুৰুত্বপূৰ্ণ।

“ভাৰত বিশ্বৰ ছুপাৰ পাৱাৰ হিচাপে স্বীকৃতি লাভ কৰাৰ দিন সমাগত”

অনুষ্ঠানত দেশৰ ভৱিষ্যৎ সম্ভাৱনাৰ প্ৰসংগ উত্থাপন কৰি বেৰিষ্টাৰ আনচাৰীয়ে কয় যে বৰ্তমান আমেৰিকাৰ দৰে শক্তিশালী দেশৰ নাগৰিকে বিশ্বৰ অন্যতম আগশাৰীৰ ৰাষ্ট্ৰৰ নাগৰিক হিচাপে গৌৰৱ অনুভৱ কৰে। তেওঁৰ বিশ্বাস, ভাৰতৰ বিকাশৰ ধাৰা অব্যাহত থাকিলে অতি সোনকালেই এনে এটা দিন আহিব, যেতিয়া ভাৰতে বিশ্বৰ অন্যতম শক্তিশালী ৰাষ্ট্ৰ তথা ‘ছুপাৰ পাৱাৰ’ হিচাপে স্বীকৃতি লাভ কৰিব।

তেওঁ কয়, “সেই দিন সমাগত। আজি আমি জলপানি প্ৰদান কৰি উৎসাহিত কৰা এই মেধাৱী ছাত্ৰ-ছাত্ৰীসকলেই আধুনিক আৰু শক্তিশালী ভাৰতবৰ্ষৰ একো একোজন কাৰিকৰ হ’ব। তেওঁলোকেই অনাগত সময়ত ভাৰতক বিশ্বৰ ছুপাৰ পাৱাৰ হিচাপে গঢ়ি তোলাত গুৰুত্বপূৰ্ণ ভূমিকা পালন কৰিব।”

বানাক্ৰান্ত শিক্ষাৰ্থীৰ শিক্ষা যাতে থমকি নৰয়

আনচাৰীয়ে লগতে উল্লেখ কৰে যে বানৰ দৰে দুৰ্যোগৰ বাবে কোনো শিক্ষাৰ্থীৰ শিক্ষা যাতে বাধাগ্ৰস্ত নহয়, সেই দিশত সমাজৰ প্ৰতিটো অংশই গুৰুত্ব দিব লাগে।

বিশেষকৈ বানত শৈক্ষিক সামগ্ৰী হেৰুওৱা আৰু আৰ্থিকভাৱে ক্ষতিগ্ৰস্ত হোৱা পৰিয়ালৰ মেধাৱী শিক্ষাৰ্থীসকলক প্ৰয়োজনীয় সহায় আগবঢ়োৱাটো সময়ৰ আহ্বান বুলি তেওঁ মন্তব্য কৰে।

তেওঁ ঘোষণা কৰে যে শিক্ষাগ্ৰহণৰ ক্ষেত্ৰত ছাত্ৰ-ছাত্ৰীসকলে যাতে কোনো ধৰণৰ অসুবিধাৰ সন্মুখীন নহয়, তাৰ প্ৰতি লক্ষ্য ৰাখি আনচাৰী ফাউণ্ডেশ্যনে আগন্তুক সময়তো সম্ভৱপৰ সকলো সহায়-সহযোগিতা আগবঢ়াই যাব।

তিনিখন জিলাৰ বানাক্ৰান্ত শিক্ষাৰ্থীৰ কাষত আনচাৰী ফাউণ্ডেশ্যন

জয়সাগৰৰ অনুষ্ঠানত শিৱসাগৰৰ লগতে চৰাইদেউ আৰু যোৰহাট জিলাৰ বানাক্ৰান্ত অঞ্চলৰ মেধাৱী শিক্ষাৰ্থীসকলকো সামৰি লোৱা হয়। নগদ ধনসহ জলপানি প্ৰদানেৰে শিক্ষাৰ্থীসকলক তেওঁলোকৰ অধ্যয়ন অব্যাহত ৰখাৰ ক্ষেত্ৰত উৎসাহিত কৰাৰ প্ৰয়াস কৰা হয়।

নৰ্থ ইষ্ট ফাউণ্ডেশ্যনৰ উদ্যোগত অনুষ্ঠিত এই কাৰ্যসূচীয়ে বানৰ পাছত পুনৰ স্বাভাৱিক জীৱনলৈ ঘূৰি অহাৰ সংগ্ৰামত শিক্ষাৰ্থীসকলৰ শিক্ষাজীৱন আৰু মানসিক উৎসাহকো সমানে গুৰুত্ব দিয়াৰ বাৰ্তা বহন কৰে।

বিশিষ্ট ব্যক্তিসকলৰ উপস্থিতি

জলপানি বিতৰণ অনুষ্ঠানত উজনি অসম মুছলিম কল্যাণ পৰিষদৰ কেন্দ্ৰীয় সমিতিৰ সভাপতি মনিৰুল ইছলাম বড়া, চিকিৎসক ডাঃ তাজিম আহমেদ, ডাঃ চাবিৰ ইছলাম, সাংবাদিক ইনামূল হাজৰিকা, এনামুদ্দিন আহমেদ, খলিলুৰ ৰহমান হাজৰিকা আৰু অধ্যাপক সীমান্ত বৰুৱাকে ধৰি কেইবাগৰাকীও বিশিষ্ট ব্যক্তি উপস্থিত থাকে।

উপস্থিত ব্যক্তিসকলে বানাক্ৰান্ত অঞ্চলৰ শিক্ষাৰ্থীসকলৰ শিক্ষাজীৱন পুনৰ স্বাভাৱিক কৰি তোলাৰ ক্ষেত্ৰত আগবঢ়োৱা এই সহযোগিতাৰ বাবে বেৰিষ্টাৰ ইলিয়াছ হুছেইন আনচাৰী আৰু আনচাৰী ফাউণ্ডেশ্যনৰ প্ৰতি কৃতজ্ঞতা প্ৰকাশ কৰে।

দুৰ্যোগৰ মাজতো শিক্ষাৰ সপোন জীয়াই ৰখাৰ প্ৰয়াস

অনুষ্ঠানটোৰ মূল বাৰ্তা আছিল—বানৰ পানীয়ে শিক্ষাৰ্থীৰ কিতাপ-পত্ৰ আৰু শৈক্ষিক সামগ্ৰী নষ্ট কৰিব পাৰে, কিন্তু তেওঁলোকৰ শিক্ষাৰ সপোন আৰু ভৱিষ্যৎ গঢ়াৰ আকাংক্ষা যাতে থমকি নৰয়।

নৰ্থ ইষ্ট ফাউণ্ডেশ্যন আৰু আনচাৰী ফাউণ্ডেশ্যনৰ এই যৌথ পদক্ষেপে বানাক্ৰান্ত শিক্ষাৰ্থীসকলক আৰ্থিক সহায় প্ৰদান কৰাৰ লগতে তেওঁলোকক অধ্যয়ন অব্যাহত ৰাখি ভৱিষ্যতে দেশৰ দক্ষ মানৱ সম্পদ হিচাপে নিজকে গঢ়ি তুলিবলৈ উৎসাহিত কৰাৰ এক ইতিবাচক বাৰ্তা প্ৰদান কৰে।