শিৱসাগৰত আবকাৰী বিভাগৰ বৃহৎ অভিযান : নাজিৰা আৰু ডিমৌ আবকাৰী চক্ৰত একেদিনাই তীব্ৰ তালাচী : ৬টা গোচৰ ৰুজু : বিপুল পৰিমাণৰ অবৈধ সুৰা আৰু পাছ জব্দ-নষ্ট
হুদুপাৰা, মেকীপুৰ, সুন্দৰপুৰৰ পৰা ডিমৌ বজাৰ, ধাইবাৰী, ককিলামাৰিলৈ অভিযান : অবৈধ সুৰা ব্যৱসায়ৰ বিৰুদ্ধে কঠোৰ স্থিতি
শিৱসাগৰ, ৯ জুন : অবৈধ সুৰা উৎপাদন আৰু সৰবৰাহৰ বিৰুদ্ধে কঠোৰ অভিযান অব্যাহত ৰাখিছে শিৱসাগৰ জিলাৰ আবকাৰী বিভাগে। মঙলবাৰে জিলাখনৰ নাজিৰা আৰু ডিমৌ আবকাৰী চক্ৰৰ অন্তৰ্গত বিভিন্ন অঞ্চলত একযোগে চলোৱা তীব্ৰ তালাচী আৰু অভিযানত বৃহৎ পৰিমাণৰ অবৈধ সুৰা, পাছ (Fermented Wash) আৰু সুৰা প্ৰস্তুতকৰণৰ সঁজুলি জব্দ কৰাৰ লগতে মুঠ ছটা গোচৰ ৰুজু কৰা হয়।
আবকাৰী বিভাগৰ সূত্ৰ অনুসৰি মঙলবাৰে জিলাখনৰ নাজিৰা আৰু ডিমৌ আবকাৰী চক্ৰৰ আবকাৰী পৰিদৰ্শক আৰু কৰ্মচাৰীসকলৰ পৃথক পৃথক দলে নিজ নিজ চক্ৰৰ বিভিন্ন সন্দেহজনক স্থানত অভিযান চলাই অবৈধ সুৰা প্ৰস্তুত আৰু সৰবৰাহৰ সৈতে জড়িত কাৰ্যকলাপৰ বিৰুদ্ধে কঠোৰ ব্যৱস্থা গ্ৰহণ কৰে।
নাজিৰা আবকাৰী চক্ৰৰ অভিযানত ৯০০ লিটাৰ পাছ নষ্ট
নাজিৰা আবকাৰী চক্ৰৰ অধীনস্থ হুদুপাৰা, মেকীপুৰ, সুন্দৰপুৰ আৰু ইয়াৰ দাঁতি-কাষৰীয়া অঞ্চলসমূহত আবকাৰী বিভাগে এক বিশেষ অভিযান চলায়। অভিযানকালত অবৈধভাৱে চুলাই সুৰা প্ৰস্তুত কৰা একাধিক স্থান চিনাক্ত কৰা হয়।
এই অভিযানত আবকাৰী বিভাগে তিনিটা পৃথক গোচৰ ৰুজু কৰাৰ লগতে বৃহৎ পৰিমাণৰ সুৰা প্ৰস্তুত সামগ্ৰী জব্দ কৰে। জব্দকৃত সামগ্ৰীৰ ভিতৰত আছিল ৯০০ লিটাৰ পাছ (Fermented Wash), যিবোৰ ঘটনাস্থলীতেই নষ্ট কৰি পেলোৱা হয়। ইয়াৰ উপৰিও সুৰা প্ৰস্তুতকৰণত ব্যৱহৃত দুটা ডি.এ. (Distillation Apparatus) চেট জব্দ কৰা হয়।
অভিযানত ১০ লিটাৰ অবৈধ চুলাই সুৰা (ID Liquor) আৰু ৩ লিটাৰ দেশীয় সুৰাও জব্দ কৰা হয়। আবকাৰী বিভাগে জব্দকৃত সামগ্ৰীসমূহ আইনগত প্ৰক্ৰিয়াৰ অধীনত জব্দ কৰাৰ লগতে সংশ্লিষ্ট গোচৰসমূহৰ তদন্ত আৰম্ভ কৰিছে।
ডিমৌ আবকাৰী চক্ৰতো অব্যাহত কঠোৰ অভিযান
আনহাতে, একেদিনাই ডিমৌ আবকাৰী চক্ৰৰ অধীনস্থ ডিমৌ বজাৰ, ধাইবাৰী, ককিলামাৰি, চুমনিগাঁও আৰু ইয়াৰ দাঁতি-কাষৰীয়া অঞ্চলসমূহতো ব্যাপক তালাচী অভিযান চলোৱা হয়।
ডিমৌ আবকাৰী চক্ৰৰ আবকাৰী পৰিদৰ্শক আৰু কৰ্মচাৰীসকলৰ দলটোৱে অভিযান চলাই অবৈধ সুৰা উৎপাদন আৰু সংৰক্ষণৰ সৈতে জড়িত স্থানসমূহ চিনাক্ত কৰে। এই অভিযানতো তিনিটা গোচৰ ৰুজু কৰা হয়।
অভিযানত ৫ লিটাৰ পাছ (Pachwai or Fermented Wash) জব্দ কৰাৰ পাছত ঘটনাস্থলীতেই নষ্ট কৰি পেলোৱা হয়। ইয়াৰ উপৰিও ১৭ লিটাৰ অবৈধ চুলাই সুৰা (ID Liquor) আৰু ১.৫ লিটাৰ বিলাতী সুৰা (IMFL) জব্দ কৰা হয়।
অবৈধ সুৰা ব্যৱসায়ৰ বিৰুদ্ধে আবকাৰী বিভাগৰ জিৰ’ ট’লাৰেন্স নীতি
আবকাৰী বিভাগৰ বিষয়াসকলে জানিবলৈ দিয়ে যে জিলাখনত অবৈধ সুৰা উৎপাদন, মজুতকৰণ আৰু সৰবৰাহৰ বিৰুদ্ধে নিয়মীয়াকৈ অভিযান চলাই থকা হৈছে। জনস্বাস্থ্যৰ বাবে ক্ষতিকাৰক এনে অবৈধ সুৰা ব্যৱসায় নিৰ্মূল কৰাৰ লক্ষ্যৰে বিভাগে অধিক কঠোৰ ব্যৱস্থা গ্ৰহণ কৰি আছে।
বিভাগীয় সূত্ৰই জনোৱা মতে, আগন্তুক দিনতো জিলাখনৰ বিভিন্ন অঞ্চলত এনে ধৰণৰ আকস্মিক তালাচী আৰু অভিযান অব্যাহত থাকিব। অবৈধ সুৰা উৎপাদন অথবা সৰবৰাহৰ সৈতে জড়িত কোনো ব্যক্তিক আইন অনুসৰি কঠোৰ ব্যৱস্থা গ্ৰহণ কৰা হ’ব বুলিও স্পষ্ট কৰি দিয়া হৈছে।
