শিৱসাগৰত ড্ৰাগছ বিৰোধী সজাগতা সভা—মাৰাত্মক ব্যাধি নিৰ্মূলৰ যুঁজত আৰক্ষীক সহযোগৰ সংকল্প জেঙনিকটীয়াৰ ৰাইজৰ : ড্ৰাগছ, মদ, জুৱা, চুৰি-ডকাইতিৰ বিৰুদ্ধে সামাজিক প্ৰতিৰোধ গঢ়াৰ আহ্বান; জেঙনিকটীয়া মছজিদ পৰিচালনা সমিতি, যুৱ সমাজ আৰু আৰক্ষী প্ৰশাসনৰ যৌথ উদ্যোগ

শিৱসাগৰ, ১৫ ছেপ্টেম্বৰ : শিৱসাগৰ নগৰ আৰু ইয়াৰ সমীপৱৰ্তী অঞ্চলত ড্ৰাগছ সৰবৰাহৰ লগতে চুৰি-ডকাইতি আৰু অন্যান্য অপৰাধমূলক কাৰ্যকলাপ বৃদ্ধি পোৱাৰ অভিযোগৰ মাজতে ঐতিহাসিক জেঙনিকটীয়া অঞ্চলত ড্ৰাগছ বিৰোধী এক গুৰুত্বপূৰ্ণ সজাগতা সভা অনুষ্ঠিত হয়। জেঙনিকটীয়া মছজিদ পৰিচালনা সমিতি, স্থানীয় যুৱ সমাজ আৰু আৰক্ষী প্ৰশাসনৰ যৌথ উদ্যোগত অনুষ্ঠিত সভাখনত ড্ৰাগছৰ পৰা নৱপ্ৰজন্মক সুৰক্ষিত ৰখা, অপৰাধ প্ৰতিৰোধত ৰাইজৰ সহযোগিতা বৃদ্ধি কৰা আৰু ভাড়াতীয়াৰ তথ্য আৰক্ষীৰ ওচৰত নথিভুক্ত কৰাৰ বিষয়ত বিশেষ গুৰুত্ব আৰোপ কৰা হয়।

উল্লেখ্য যে, শিৱসাগৰৰ কেতবোৰ অঞ্চলৰ ভাড়াঘৰত থকা একাংশ ব্যক্তিৰ বিৰুদ্ধে ড্ৰাগছ সৰবৰাহকে ধৰি বিভিন্ন অপৰাধমূলক কাৰ্যকলাপত জড়িত থকাৰ অভিযোগ উত্থাপন হৈ আহিছে। এই অভিযোগসমূহৰ পৰিপ্ৰেক্ষিততে জেঙনিকটীয়া অঞ্চলৰ মছজিদ পৰিচালনা সমিতি আৰু যুৱ সমাজে বিষয়টোক লৈ উদ্বেগ প্ৰকাশ কৰাৰ লগতে ড্ৰাগছৰ বিৰুদ্ধে সামাজিক প্ৰতিৰোধ গঢ়ি তোলাৰ পদক্ষেপ গ্ৰহণ কৰিছে। কোনো বিশেষ ভাষিক বা আঞ্চলিক পৰিচয়ৰ ভিত্তিত নহয়, সন্দেহজনক বা অপৰাধমূলক কাৰ্যকলাপৰ ক্ষেত্ৰত তথ্য-প্ৰমাণ আৰু আইনগত প্ৰক্ৰিয়াৰ ভিত্তিত ব্যৱস্থা গ্ৰহণৰ ওপৰত সভাত গুৰুত্ব দিয়া হয়।

জিলা প্ৰশাসন আৰু আৰক্ষীৰ সহযোগ বিচাৰি লিখিত আবেদন

নৱপ্ৰজন্মক ধ্বংসৰ দিশে ঠেলি দিয়া ড্ৰাগছৰ প্ৰসাৰ ৰোধ আৰু অঞ্চলটোক অপৰাধমুক্ত কৰি ৰখাৰ লক্ষ্যৰে জেঙনিকটীয়া মছজিদ পৰিচালনা সমিতি আৰু স্থানীয় যুৱ সমাজে শিৱসাগৰ জিলা প্ৰশাসন আৰু আৰক্ষী প্ৰশাসনৰ সহযোগিতা বিচাৰি ইতিমধ্যে লিখিত আবেদন দাখিল কৰিছিল।

এই উদ্যোগৰ প্ৰতি সঁহাৰি জনাই শিৱসাগৰ জিলা আয়ুক্ত মৃদুল যাদৱ আৰু জ্যেষ্ঠ আৰক্ষী অধীক্ষক পাপৰি চেতিয়াই স্থানীয় ৰাইজে গ্ৰহণ কৰা ড্ৰাগছ বিৰোধী পদক্ষেপত প্ৰশাসনৰ সহযোগিতা আগবঢ়োৱাৰ আশ্বাস দিয়ে।

ইয়াৰ পাছতেই জেঙনিকটীয়া ৫০২ নং বালিকা প্ৰাথমিক বিদ্যালয়ত জেঙনিকটীয়া মছজিদ পৰিচালনা সমিতি, স্থানীয় যুৱ সমাজ আৰু আৰক্ষী প্ৰশাসনৰ যৌথ উদ্যোগত সজাগতামূলক সভাখন অনুষ্ঠিত হয়। শিৱসাগৰ জেঙনিকটীয়া জুম্মা মছজিদ পৰিচালনা সমিতিৰ সভাপতি জাহিদ উল্লাৰ সভাপতিত্বত অনুষ্ঠিত সভাখনত অঞ্চলটোৰ বহু লোক উপস্থিত থাকে।

‘ড্ৰাগছৰ বিৰুদ্ধে আৰক্ষীৰ কঠোৰ অভিযান অব্যাহত’—ময়িদুল ইছলাম

সজাগতা সভাত শিৱসাগৰ জিলাৰ অতিৰিক্ত আৰক্ষী অধীক্ষক ময়িদুল ইছলামে কয় যে, মাৰাত্মক ড্ৰাগছৰ বিৰুদ্ধে শিৱসাগৰ আৰক্ষীয়ে কঠোৰ অভিযান অব্যাহত ৰাখিছে। এই অভিযানৰ সময়ত অবৈধ ড্ৰাগছ সৰবৰাহৰ অভিযোগত বিভিন্ন লোকক গ্ৰেপ্তাৰ কৰাৰ লগতে বৃহৎ মূল্যৰ নিষিদ্ধ ড্ৰাগছ জব্দ কৰা হৈছে বুলি তেওঁ উল্লেখ কৰে।

জেঙনিকটীয়া অঞ্চলৰ ৰাইজে নিজাববীয়াকৈ ড্ৰাগছৰ বিৰুদ্ধে আগবাঢ়ি অহা পদক্ষেপক আদৰণি জনাই তেওঁ কয় যে, এখন সুস্থ আৰু সবল সমাজ গঢ়ি তুলিবলৈ কেৱল ড্ৰাগছেই নহয়, মদ, জুৱা, চুৰি আৰু ডকাইতিৰ দৰে সামাজিক ব্যাধি তথা অপৰাধমূলক কাৰ্যকলাপৰ বিৰুদ্ধেও একেলগে প্ৰতিৰোধ গঢ়ি তুলিব লাগিব। ইয়াৰ বাবে আৰক্ষীৰ লগতে স্থানীয় ৰাইজৰ সক্ৰিয় সহযোগিতা অত্যন্ত প্ৰয়োজনীয় বুলি তেওঁ উল্লেখ কৰে।

ভাড়াতীয়াৰ নাম-ঠিকনা আৰক্ষীৰ ওচৰত নথিভুক্ত কৰাৰ আহ্বান

সভাত ভাড়াঘৰ আৰু ভাড়াতীয়াৰ তথ্য নথিভুক্ত কৰাৰ বিষয়টো বিশেষভাৱে উত্থাপন কৰে অতিৰিক্ত আৰক্ষী অধীক্ষক ময়িদুল ইছলামে। তেওঁ ভাড়াঘৰৰ মালিকসকলক শিৱসাগৰ সদৰ আৰক্ষী থানাৰ পৰা ভাড়াতীয়াৰ নাম-ঠিকনাসহ প্ৰয়োজনীয় তথ্য সন্নিৱিষ্ট কৰাৰ প্ৰ-পত্ৰ সংগ্ৰহ কৰি পূৰণ কৰাৰ পাছত নিকটৱৰ্তী আৰক্ষী থানাত জমা দিবলৈ আহ্বান জনায়।

তেওঁ লগতে কয় যে, ভাড়াতীয়াৰ বিষয়ে প্ৰয়োজনীয় তথ্য আৰক্ষীক নিদিয়া অৱস্থাত কোনো ভাড়াতীয়া অপৰাধমূলক কাৰ্যকলাপত জড়িত হোৱা ধৰা পৰিলে ঘটনাটোৰ পৰিস্থিতি আৰু প্ৰযোজ্য আইনৰ ভিত্তিত সংশ্লিষ্ট ভাড়াঘৰৰ মালিকৰ ভূমিকাও আৰক্ষীয়ে পৰীক্ষা কৰিব আৰু প্ৰয়োজন অনুসৰি বিহিত ব্যৱস্থা গ্ৰহণ কৰিব।

প্ৰগতি চিকিৎসালয়ৰ কাষৰ দোকান উচ্ছেদৰ প্ৰসংগ উত্থাপন

সভাত বিশিষ্ট অতিথি হিচাপে উপস্থিত থকা উজনি অসম মুছলিম কল্যাণ পৰিষদৰ কেন্দ্ৰীয় সমিতিৰ সভাপতি মনিৰুল ইছলাম বড়াই কয় যে, জিলা প্ৰশাসন আৰু আৰক্ষীৰ সহযোগত জেঙনিকটীয়াৰ ইউথ গ্ৰুপে কিছুদিন পূৰ্বে প্ৰগতি চিকিৎসালয়ৰ কাষত ড্ৰাগছ সৰবৰাহৰ সৈতে জড়িত ব্যক্তিয়ে আশ্ৰয় লোৱাৰ অভিযোগ থকা এখন দোকান উচ্ছেদৰ ক্ষেত্ৰত উদ্যোগ গ্ৰহণ কৰিছিল।

তেওঁৰ অভিযোগ অনুসৰি, ইয়াৰ পাছতো জেঙনিকটীয়া, ধাইআলি আৰু পকাঘাটকে ধৰি কেতবোৰ অঞ্চলত ড্ৰাগছৰ লগতে চুৰি-ডকাইতিৰ দৰে ঘটনা সংঘটিত হৈ আহিছে। এনে পৰিস্থিতিত আৰক্ষী আৰু স্থানীয় ৰাইজে সমন্বিতভাৱে অধিক সজাগ হোৱাৰ প্ৰয়োজন আছে বুলি তেওঁ মন্তব্য কৰে।

‘সন্দেহজনক ব্যক্তিক চিনাক্ত কৰি আইনগত ব্যৱস্থা গ্ৰহণ কৰক’

মনিৰুল ইছলাম বড়াই কয় যে, উজনি অসম মুছলিম কল্যাণ পৰিষদে সংবাদপত্ৰ আৰু বৈদ্যুতিন মাধ্যমৰ জৰিয়তে ইতিপূৰ্বে একাধিকবাৰ ভাড়াঘৰৰ মালিকসকলক তেওঁলোকৰ ভাড়াতীয়াৰ নাম-ঠিকনাসহ প্ৰয়োজনীয় তথ্য আৰক্ষীৰ ওচৰত দাখিল কৰিবলৈ অনুৰোধ জনাই আহিছে। কিন্তু বহু ভাড়াঘৰৰ মালিকে বিষয়টোক প্ৰয়োজনীয় গুৰুত্ব নিদিয়াৰ অভিযোগ তেওঁ উত্থাপন কৰে।

সেয়েহে জেঙনিকটীয়া অঞ্চলৰ পৰাই আৰক্ষীয়ে স্থানীয় ৰাইজৰ সহযোগত ভাড়াতীয়াৰ তথ্য পৰীক্ষণৰ অভিযান আৰম্ভ কৰা উচিত বুলি তেওঁ মত প্ৰকাশ কৰে। এই প্ৰক্ৰিয়াত কোনো সন্দেহজনক বা অপৰাধমূলক কাৰ্যকলাপৰ তথ্য পোৱা গ’লে আইন অনুসৰি তদন্ত কৰি কঠোৰ ব্যৱস্থা গ্ৰহণ কৰিবলৈও তেওঁ আৰক্ষীক আহ্বান জনায়।

মছজিদ সমন্বয়ৰক্ষী সমিতিৰ সৈতে আলোচনাৰ আহ্বান

মনিৰুল ইছলাম বড়াই লগতে শিৱসাগৰ জিলা আয়ুক্ত মৃদুল যাদৱ আৰু জ্যেষ্ঠ আৰক্ষী অধীক্ষক পাপৰি চেতিয়াক জিলাখনৰ মছজিদ সমন্বয়ৰক্ষী সমিতিৰ সৈতে শীঘ্ৰে আলোচনা অনুষ্ঠিত কৰিবলৈ আহ্বান জনায়। তেওঁৰ মতে, মছজিদ সমিতিসমূহৰ অধীনস্থ অঞ্চলৰ ভাড়াঘৰৰ মালিকসকলক ভাড়াতীয়াৰ নাম-ঠিকনা আৰু অন্যান্য প্ৰয়োজনীয় তথ্য নিকটৱৰ্তী আৰক্ষী থানাত দাখিল কৰাৰ ক্ষেত্ৰত সজাগ আৰু উৎসাহিত কৰিবলৈ সমন্বিত পদক্ষেপ গ্ৰহণ কৰা উচিত।

ড্ৰাগছমুক্ত সমাজ গঢ়াৰ সংকল্প

সজাগতা সভাখনত জেঙনিকটীয়া যুৱ সমাজ আৰু ইউথ গ্ৰুপৰ বিষয়ববীয়াসকলেও ড্ৰাগছ আৰু অন্যান্য অপৰাধমূলক কাৰ্যকলাপ ৰোধৰ বাবে বিভিন্ন পৰামৰ্শ আগবঢ়ায়। স্থানীয় ৰাইজে আৰক্ষী-প্ৰশাসনৰ সৈতে সহযোগিতা বজাই ৰাখি অঞ্চলটোত ড্ৰাগছৰ বিৰুদ্ধে সজাগতা আৰু সামাজিক প্ৰতিৰোধ অধিক শক্তিশালী কৰাৰ পোষকতা কৰে।

সভাখনৰ মূল বাৰ্তা আছিল—ড্ৰাগছৰ বিৰুদ্ধে যুঁজ কেৱল আৰক্ষীৰ দায়িত্ব নহয়; পৰিয়াল, সমাজ, যুৱপ্ৰজন্ম আৰু প্ৰশাসনৰ সমন্বিত প্ৰচেষ্টাৰ জৰিয়তেহে ড্ৰাগছ তথা অন্যান্য অপৰাধমূলক কাৰ্যকলাপৰ পৰা সমাজক সুৰক্ষিত কৰি ৰাখিব পৰা যাব।