শিৱসাগৰত জিলা লেখিকা সমাৰোহ সমিতিৰ পঞ্চম দ্বি-বাৰ্ষিক অধিৱেশন সম্পন্ন : ‘সুভাষিণী’, ‘গল্প গুচ্ছ’ আৰু ‘অভিশপ্ত অক্টোবৰ’ গ্ৰন্থ উন্মোচন : নতুন জিলা সমিতি গঠন
ঊষা শইকীয়াক সভানেত্ৰী আৰু অনু মুদৈক সম্পাদিকাৰ দায়িত্ব
শিৱসাগৰ, ১৫ জুন : সদৌ অসম লেখিকা সমাৰোহ সমিতিৰ অন্তৰ্গত শিৱসাগৰ জিলা লেখিকা সমাৰোহ সমিতিৰ পঞ্চম দ্বি-বাৰ্ষিক অধিৱেশন শ্ৰী শ্ৰী শংকৰদেৱ সমাজ নামঘৰৰ শ্ৰী মাধৱদেৱ কলা-কৃষ্টি কেন্দ্ৰ প্ৰেক্ষাগৃহত গাম্ভীৰ্যপূৰ্ণ পৰিৱেশত অনুষ্ঠিত হয়। সাহিত্য, সংস্কৃতি আৰু সৃষ্টিশীলতাক একেলগে আগবঢ়াই নিয়াৰ লক্ষ্যৰে অনুষ্ঠিত এই অধিৱেশনত জিলাখনৰ বিভিন্ন শাখাৰ বিষয়ববীয়া, সদস্যা আৰু বিশিষ্ট ব্যক্তিসকলে অংশগ্ৰহণ কৰে।
গীত, বৰগীত আৰু শ্ৰদ্ধাঞ্জলিৰে শুভাৰম্ভ
শিৱসাগৰ জিলা লেখিকা সমাৰোহ সমিতিৰ সম্পাদিকা জেউতি বৰা ভূঞাই আঁত ধৰা অনুষ্ঠানৰ আৰম্ভণিতে সমিতিৰ সদস্যাসকলে সমবেতভাৱে “চিৰ চেনেহী মোৰ ভাষা জননী” গীত পৰিৱেশন কৰে। ইয়াৰ পিছতে প্ৰণীতা লাচিতে বৰগীত পৰিৱেশন কৰে। বিশিষ্ট সমাজসেৱিকা মণিকা শইকীয়াই বন্তি প্ৰজ্বলন কৰি অনুষ্ঠানৰ শুভাৰম্ভ কৰে। অনুষ্ঠানত প্ৰয়াত শীলা বৰঠাকুৰ আৰু জিলাৰ নগৰাকী সদস্যাৰ স্মৃতিত শ্ৰদ্ধাঞ্জলি জ্ঞাপন কৰা হয়।
মুকলি সভাত সাহিত্য-সংস্কৃতিৰ বিকাশৰ ওপৰত গুৰুত্ব
মুকলি সভাখন উদ্বোধন কৰে সদৌ অসম লেখিকা সমাৰোহ সমিতিৰ উপদেষ্টা তথা বিশিষ্ট কবি স্নিগ্ধাৰাণী গগৈয়ে। দীপালী বৰুৱা শইকীয়াই আদৰণি ভাষণ আগবঢ়োৱাৰ পিছত জিলা লেখিকা সমাৰোহ সমিতিৰ সভানেত্ৰী ড° অৰুন্ধতী মহন্তৰ সভাপতিত্বত মুকলি সভা অনুষ্ঠিত হয়। সভাত নিৰ্দিষ্ট বক্তা হিচাপে উপস্থিত থাকি অধ্যাপিকা গুণমণি গগৈয়ে সাহিত্য-সংস্কৃতি আৰু নাৰী সৃষ্টিশীলতাৰ বিকাশ সম্পৰ্কে সাৰগৰ্ভ বক্তব্য আগবঢ়ায়।
তিনিখন গুৰুত্বপূৰ্ণ সাহিত্যকৃতি উন্মোচন
পঞ্চম দ্বি-বাৰ্ষিক অধিৱেশনৰ লগত সংগতি ৰাখি প্ৰকাশিত কেইবাখনো সাহিত্যকৃতি উন্মোচন কৰা হয়। দেৱযানী মহন্ত আৰু ড° মিন্তী গগৈৰ সম্পাদনাত প্ৰকাশিত মুখপত্ৰ ‘সুভাষিণী’, বিশিষ্ট লেখিকা অনুৰাধা দত্ত আৰু নিকুমণি দত্তৰ সম্পাদনাৰে প্ৰকাশিত গল্প সংকলন ‘গল্প গুচ্ছ’, আৰু দীপালী গগৈ ৰাজকোঁৱৰৰ গল্প সংকলন ‘অভিশপ্ত অক্টোবৰ’ উন্মোচন কৰে জাঁজী হেমনাথ শৰ্মা মহাবিদ্যালয়ৰ অধ্যক্ষ ড° মানজিত গগৈয়ে। তেওঁ লেখিকা সমাৰোহ সমিতিৰ সাহিত্যচৰ্চা আৰু প্ৰকাশনমূলক প্ৰচেষ্টাৰ উচ্চ প্ৰশংসা কৰি ভৱিষ্যতেও এই ধাৰা অব্যাহত ৰাখিবলৈ শুভকামনা জনায়।
মহিলাসকলৰ সুপ্ত প্ৰতিভা বিকাশৰ ক্ষেত্ৰ সৃষ্টি কৰিছে সমিতিয়ে
সংবাদমাধ্যমৰ সৈতে হোৱা বাৰ্তালাপত বিদায়ী জিলা সভানেত্ৰী ড° অৰুন্ধতী মহন্তই কয় যে, শিৱসাগৰ জিলা শাখাৰ অধীনত বৰ্তমান ১২টা আঞ্চলিক শাখা সক্ৰিয়ভাৱে কাম কৰি আছে আৰু ইয়াৰ সদস্য সংখ্যা এক হাজাৰৰো অধিক। প্ৰতিদিনে নতুন সদস্যাৰ সংযোগে সংগঠনটো অধিক শক্তিশালী কৰি তুলিছে।
তেওঁ কয়, সাহিত্য সৃষ্টিৰ জৰিয়তে মহিলাসকলৰ সুপ্ত প্ৰতিভা, সৃজনশীলতা আৰু লিখন-দক্ষতাৰ বিকাশ ঘটাবলৈ লেখিকা সমাৰোহ সমিতিয়ে এক উপযুক্ত পৰিৱেশ গঢ়ি তুলিছে। সাহিত্যৰ উপৰিও সমিতিৰ সদস্যাসকল সংগীত, সত্ৰীয়া নৃত্য, লোকনৃত্য আৰু লোকসংগীতৰ ক্ষেত্ৰতো সমানে দক্ষতা প্ৰদৰ্শন কৰি আহিছে বুলি তেওঁ মন্তব্য কৰে।
নতুন জিলা সমিতি গঠন
অধিৱেশনত সৰ্বসন্মতিক্ৰমে ঊষা শইকীয়াক সভানেত্ৰী আৰু অনু মুদৈক সম্পাদিকা হিচাপে লৈ শিৱসাগৰ জিলা লেখিকা সমাৰোহ সমিতিৰ নতুন সমিতি গঠন কৰা হয়। নতুন নেতৃত্বৰ অধীনত সাহিত্য-সংস্কৃতিৰ ক্ষেত্ৰত সংগঠনটোৱে অধিক গতিশীলভাৱে আগবাঢ়িব বুলি উপস্থিত সদস্যাসকলে আশা প্ৰকাশ কৰে।
সাহিত্য, সংস্কৃতি আৰু নাৰী শক্তিৰ মিলনমেলা
উল্লেখযোগ্য যে, অধিৱেশনত সমিতিৰ কেইবাগৰাকীও সদস্যাই আধুনিক গীত পৰিৱেশন কৰি সাংস্কৃতিক অনুষ্ঠানৰ সৌন্দৰ্য বৃদ্ধি কৰে। সাহিত্যচৰ্চা, প্ৰকাশন, সাংগঠনিক শক্তিবৃদ্ধি আৰু নাৰী সৃষ্টিশীলতাৰ বিকাশৰ লক্ষ্যৰে অনুষ্ঠিত এই দ্বি-বাৰ্ষিক অধিৱেশনখন এক সফল আৰু স্মৰণীয় অনুষ্ঠান হিচাপে পৰিগণিত হয়।
