বিশ্ব পৰিৱেশ দিৱসত বীৰ লাচিত বৰফুকন মহাবিদ্যালয়ত সজাগতা সভা : ‘প্লাষ্টিক প্ৰদূষণমুক্ত পৃথিৱী গঢ়াৰ ক্ষেত্ৰত ছাত্ৰ-ছাত্ৰীসকলৰ ভূমিকাই হ’ব নিৰ্ণায়ক’ : ড° সীমান্ত বৰুৱা
পৰিৱেশ সংৰক্ষণ, প্লাষ্টিক প্ৰদূষণ আৰু বহনক্ষম জীৱনশৈলীৰ ওপৰত বিশদ আলোচনা
শিৱসাগৰ, ৫ জুন : বিশ্ব পৰিৱেশ দিৱস উপলক্ষে শিৱসাগৰৰ অগ্ৰণী উচ্চ শিক্ষানুষ্ঠান বীৰ লাচিত বৰফুকন মহাবিদ্যালয়ত আজি এক সজাগতা সভা আৰু আলোচনা অনুষ্ঠানৰ আয়োজন কৰা হয়। মহাবিদ্যালয়ৰ উদ্যোগত আয়োজিত এই কাৰ্যসূচীত বৃহৎ সংখ্যক ছাত্ৰ-ছাত্ৰীয়ে অংশগ্ৰহণ কৰি পৰিৱেশ সংৰক্ষণ, প্ৰাকৃতিক সম্পদৰ সঠিক ব্যৱহাৰ আৰু প্লাষ্টিক প্ৰদূষণৰ ক্ষতিকাৰক প্ৰভাৱ সম্পৰ্কে মূল্যৱান তথ্য লাভ কৰে।
অনুষ্ঠানৰ আৰম্ভণিতে মহাবিদ্যালয়ৰ অধ্যক্ষ ড° পংকজজ্যোতি হাজৰিকাই উপস্থিত ছাত্ৰ-ছাত্ৰীসকলক বিশ্ব পৰিৱেশ দিৱসৰ শুভেচ্ছা জ্ঞাপন কৰি পৰিৱেশ সুৰক্ষাৰ ক্ষেত্ৰত নতুন প্ৰজন্মক অধিক দায়বদ্ধ হ’বলৈ আহ্বান জনায়। তেওঁ কয় যে সুস্থ সমাজ আৰু উন্নত ভৱিষ্যৎ গঢ়াৰ বাবে পৰিৱেশ সংৰক্ষণক জীৱনশৈলীৰ অংশ হিচাপে গ্ৰহণ কৰাটো অতি প্ৰয়োজনীয়।
মহাবিদ্যালয়ৰ আভ্যন্তৰীণ মান নিৰ্ণায়ক কোষ (IQAC)-ৰ সমন্বয়ক ড° শান্তনু বুঢ়াগোহাঁইৰ সঞ্চালনাত অনুষ্ঠিত সভাত মহাবিদ্যালয়ৰ উপাধ্যক্ষ লক্ষী শেনচোৱা আৰু সমাজতত্ত্ব বিভাগৰ মূৰব্বী তথা বিশিষ্ট শিক্ষাবিদ ড° সীমান্ত বৰুৱা উপস্থিত থাকে।
বিশ্ব পৰিৱেশ দিৱসৰ ইতিহাস ব্যাখ্যা
উপাধ্যক্ষ লক্ষী শেনচোৱাই তেওঁৰ ভাষণত বিশ্ব পৰিৱেশ দিৱসৰ ইতিহাস আৰু তাৎপৰ্য ব্যাখ্যা কৰি কয় যে প্ৰাকৃতিক পৰিৱেশ সংৰক্ষণ আৰু জনসচেতনতা বৃদ্ধিৰ লক্ষ্যৰে সমগ্ৰ বিশ্বতে প্ৰতি বছৰে ৫ জুনত বিশ্ব পৰিৱেশ দিৱস পালন কৰা হয়।
তেওঁ উল্লেখ কৰে যে ১৯৭২ চনত ছুইডেনৰ ষ্টকহ’ম চহৰত অনুষ্ঠিত ৰাষ্ট্ৰসংঘৰ পৰিৱেশ সম্পৰ্কীয় ঐতিহাসিক সন্মিলনত এই দিৱস পালনৰ সিদ্ধান্ত গ্ৰহণ কৰা হৈছিল। তাৰ পিছত ১৯৭৩ চনত প্ৰথমবাৰৰ বাবে বিশ্ব পৰিৱেশ দিৱস আনুষ্ঠানিকভাৱে পালন কৰা হয়। তেতিয়াৰ পৰাই বিশ্বব্যাপী পৰিৱেশ সুৰক্ষা আন্দোলনৰ এক গুৰুত্বপূৰ্ণ মঞ্চ হিচাপে এই দিৱস উদযাপিত হৈ আহিছে।
‘পৰিৱেশ’ৰ ধাৰণা আৰু গুৰুত্ব ব্যাখ্যা
সজাগতা সভাত সমল ব্যক্তি হিচাপে উপস্থিত থাকি ড° সীমান্ত বৰুৱাই পৰিৱেশৰ ধাৰণা, ইয়াৰ উপাদান আৰু মানৱ জীৱনৰ সৈতে ইয়াৰ নিবিড় সম্পৰ্কৰ বিষয়ে বিস্তৃত ব্যাখ্যা আগবঢ়ায়।
তেওঁ কয় যে “পৰিৱেশ” শব্দটোৰ উৎপত্তি ফৰাচী শব্দ “Environner”-ৰ পৰা হৈছে, যাৰ অৰ্থ হৈছে ‘চাৰিওফালৰ আৱেষ্টনী’। এই আৱেষ্টনীৰ মাজতেই মানুহ, জীৱ-জন্তু, উদ্ভিদ আৰু অন্যান্য জীৱই জীৱনধাৰণ, বংশবৃদ্ধি আৰু বিকাশৰ সুযোগ লাভ কৰে।
তেওঁৰ মতে, মাটি, পানী, বায়ু, উদ্ভিদ, প্ৰাণী আৰু মানুহৰ মাজত গঢ় লৈ উঠা পাৰস্পৰিক সম্পৰ্কই পৰিৱেশ গঠন কৰে। এই সম্পৰ্ক সুস্থ আৰু সুষম হৈ থাকিলেহে জীৱজগতৰ অস্তিত্ব নিশ্চিত হয়।
প্লাষ্টিক প্ৰদূষণৰ ভয়াৱহতা আৰু কৰণীয়
আলোচনাৰ মূল বিষয় হিচাপে প্লাষ্টিক প্ৰদূষণৰ ওপৰত আলোকপাত কৰি ড° বৰুৱাই কয় যে বৰ্তমান বিশ্বই সন্মুখীন হোৱা অন্যতম বৃহৎ পৰিৱেশজনিত সংকট হৈছে প্লাষ্টিক আৱৰ্জনা।
তেওঁ কয় যে প্লাষ্টিকৰ অনুপযুক্ত ব্যৱস্থাপনাই মাটি, পানী আৰু বায়ুমণ্ডলত দীৰ্ঘম্যাদী ক্ষতিকাৰক প্ৰভাৱ পেলায়। নদী-নালা, খাল-বিল আৰু সাগৰ-মহাসাগৰত নিক্ষেপ কৰা প্লাষ্টিক সামগ্ৰীয়ে জলজ জীৱবৈচিত্ৰ্য ধ্বংস কৰাৰ লগতে খাদ্য শৃংখলৰ জৰিয়তে মানৱ স্বাস্থ্যৰ বাবেও বিপদ কঢ়িয়াই আনে।
ড° বৰুৱাই লগতে কয় যে “প্লাষ্টিক বৰ্জন কৰি আৰু আৱৰ্জনাৰ বিজ্ঞানসন্মত ব্যৱস্থাপনা নিশ্চিত কৰি আমি এখন অধিক পৰিষ্কাৰ, সুস্থ আৰু বাসোপযোগী পৃথিৱী গঢ়ি তুলিব পাৰোঁ। প্লাষ্টিক প্ৰদূষণ হ্ৰাসৰ ক্ষেত্ৰত ছাত্ৰ-ছাত্ৰীসকলেই সমাজত সজাগতা সৃষ্টিৰ অন্যতম শক্তিশালী মাধ্যম হ’ব পাৰে।”
তেওঁ নৱীকৰণযোগ্য আৰু পৰিৱেশবান্ধৱ সামগ্ৰীৰ ব্যৱহাৰ বৃদ্ধিৰ লগতে আৱৰ্জনা পুনঃব্যৱহাৰ আৰু পুনঃপ্ৰক্ৰিয়াকৰণৰ ওপৰতো গুৰুত্ব আৰোপ কৰে।
ছাত্ৰ-ছাত্ৰীসকলক সেউজীয়া পৃথিৱী গঢ়াৰ আহ্বান
অনুষ্ঠানত বক্তাসকলে একেমুখে কয় যে বিশ্ব উষ্ণায়ন, বনাঞ্চল ধ্বংস, জলবায়ু পৰিৱৰ্তন আৰু প্ৰদূষণৰ দৰে সমস্যাৰ মোকাবিলা কৰিবলৈ হ’লে সকলো নাগৰিকে দায়িত্বশীল ভূমিকা গ্ৰহণ কৰিব লাগিব।
বিশেষকৈ ছাত্ৰ-ছাত্ৰীসকলক গছপুলি ৰোপণ, প্লাষ্টিক ব্যৱহাৰ হ্ৰাস, পৰিষ্কাৰ-পৰিচ্ছন্নতা বজাই ৰখা আৰু পৰিৱেশ সুৰক্ষাৰ ক্ষেত্ৰত সমাজক নেতৃত্ব দিবলৈ আহ্বান জনোৱা হয়।
অনুষ্ঠানৰ শেষত উপস্থিত সকলোৱে এখন সেউজীয়া, সুস্থ আৰু প্ৰদূষণমুক্ত পৃথিৱী গঢ়ি তোলাৰ সংকল্প গ্ৰহণ কৰে।
