অসম বিধানসভাৰ প্ৰেক্ষাগৃহত অনুষ্ঠিত ‘যুৱ ভাৰতীয় সংসদ-২০২৬’ত জিলিকিল নামতিৰ দুই প্ৰতিভা : ৰাষ্ট্ৰীয় পৰ্যায়লৈ নিৰ্বাচিত স্বস্তিকা বৰবৰা আৰু ঋষিতা বৰা : স্বস্তিকালৈ পাৰদৰ্শিতাৰ বিশেষ বঁটা : সংগ্ৰামৰ মাজেৰে আগবাঢ়ি অহা দুই কন্যাৰ সফলতাত শিৱসাগৰ-চৰাইদেউত আনন্দৰ জোৱাৰ
শিৱসাগৰ, ৬ জুলাই : অসম বিধানসভাৰ পবিত্ৰ প্ৰেক্ষাগৃহত অনুষ্ঠিত হোৱা ‘যুৱ ভাৰতীয় সংসদ-২০২৬’ত নিজৰ মেধা, তীক্ষ্ণ বুদ্ধিমত্তা আৰু আকৰ্ষণীয় বাগ্মিতাৰে ৰাজ্যৰ ভিতৰত বিশেষ পৰিচয় দাঙি ধৰিবলৈ সক্ষম হৈছে শিৱসাগৰ জিলাৰ নামতি অঞ্চলৰ দুগৰাকী প্ৰতিভাৱান কন্যা স্বস্তিকা বৰবৰা আৰু ঋষিতা বৰাই। ৰাজ্যিক পৰ্যায়ত উৎকৃষ্ট প্ৰদৰ্শন আগবঢ়াই দুয়োগৰাকী ছাত্ৰীয়ে ৰাষ্ট্ৰীয় পৰ্যায়ত অসমক প্ৰতিনিধিত্ব কৰাৰ সুযোগ লাভ কৰিছে।
৩৩ জিলাৰ ১৭০ গৰাকী মেধাৱী শিক্ষাৰ্থীৰ মাজত উজলিল দুই ছাত্ৰী
উল্লেখযোগ্য যে, এইবাৰৰ ‘যুৱ ভাৰতীয় সংসদ-২০২৬’ অনুষ্ঠানত অসমৰ ৩৩খন জিলাৰ ৭১খন বিদ্যালয়ৰ পৰা নিৰ্বাচিত মুঠ ১৭০ গৰাকী মেধাৱী শিক্ষাৰ্থীয়ে অংশগ্ৰহণ কৰে। ইয়াৰ পূৰ্বে জিলা পৰ্যায়ত ১,০০০ৰো অধিক শিক্ষাৰ্থীৰ মাজৰ পৰা এইসকল প্ৰতিযোগীক বাছনি কৰা হৈছিল।
ৰাজ্যিক পৰ্যায়ৰ প্ৰদৰ্শনৰ ভিত্তিত মাত্ৰ ২৫ গৰাকী শিক্ষাৰ্থীয়ে ৰাষ্ট্ৰীয় পৰ্যায়ৰ অনুষ্ঠানত অংশগ্ৰহণৰ সুযোগ লাভ কৰে। এই নিৰ্বাচিত শিক্ষাৰ্থীসকলৰ ভিতৰত স্থান লাভ কৰি নামতিৰ স্বস্তিকা বৰবৰা আৰু ঋষিতা বৰাই অঞ্চলটোৰ লগতে সমগ্ৰ শিৱসাগৰ-চৰাইদেউবাসীলৈ গৌৰৱ কঢ়িয়াই আনিছে।
চৰাইদেউক প্ৰতিনিধিত্ব কৰি স্বস্তিকা বৰবৰাৰ বিশেষ সফলতা
নামতি দিকচু মাউৎ গাঁৱৰ শিক্ষক অসীম বৰবৰা আৰু শিক্ষয়িত্ৰী সংগীতা বৰুৱাৰ কন্যা স্বস্তিকা বৰবৰাই ৰাজ্যিক পৰ্যায়ৰ এই যুৱ সংসদত চৰাইদেউ জিলাক প্ৰতিনিধিত্ব কৰি উৎকৃষ্ট প্ৰদৰ্শন আগবঢ়ায়।
নিজৰ আত্মবিশ্বাস, যুক্তিপূৰ্ণ বক্তব্য আৰু বাগ্মিতাৰ দক্ষতাৰে বিচাৰকৰ দৃষ্টি আকৰ্ষণ কৰা স্বস্তিকাই এতিয়া ৰাষ্ট্ৰীয় পৰ্যায়ত অসমক প্ৰতিনিধিত্ব কৰিব।
বিশেষকৈ, ৰাষ্ট্ৰীয় পৰ্যায়লৈ নিৰ্বাচিত হোৱা ২৫ গৰাকী শিক্ষাৰ্থীৰ ভিতৰত পাৰদৰ্শিতাৰ ভিত্তিত নিৰ্বাচিত ১৫ গৰাকী শিক্ষাৰ্থীক বিশেষ বঁটা প্ৰদান কৰা হয়। সেই ১৫ গৰাকীৰ ভিতৰত স্থান লাভ কৰি পাটসাঁকো জ্যেষ্ঠ মাধ্যমিক বিদ্যালয়ৰ ছাত্ৰী স্বস্তিকা বৰবৰাই লাভ কৰে বিশেষ সন্মান।
প্ৰত্যাহ্বানক নেওচি সফলতাৰ শিখৰলৈ ঋষিতা
আনহাতে, নামতিৰ বেলিমুখীয়া চাংমাই গাঁৱৰ এক সাধাৰণ পৰিয়ালৰ কন্যা ঋষিতা বৰাৰ সফলতাই সকলোৰে মন জয় কৰিছে। নগেন বৰা আৰু অঞ্জলী বৰাৰ কন্যা ঋষিতা বৰাই ৰাজ্যিক পৰ্যায়ত শিৱসাগৰ জিলাক প্ৰতিনিধিত্ব কৰি নিজৰ প্ৰতিভাৰ পৰিচয় দিয়ে আৰু ৰাষ্ট্ৰীয় পৰ্যায়লৈ নিৰ্বাচিত হয়।
ঋষিতা বৰা স্থানীয় দুৰ্লভ চন্দ্ৰ গগৈ জকাইচুক উচ্চতৰ মাধ্যমিক বিদ্যালয়ৰ একাদশ শ্ৰেণীৰ এগৰাকী ছাত্ৰী।
সুবিধাৰ অভাৱেও বাধা দিব নোৱাৰিলে ঋষিতাৰ সপোনক
অত্যন্ত প্ৰত্যাহ্বানপূৰ্ণ পৰিৱেশৰ মাজত অধ্যয়ন কৰি অহা ঋষিতাৰ সফলতাই বহুতৰ বাবে প্ৰেৰণাৰ উৎস হৈ পৰিছে। আজিও তেওঁৰ ঘৰলৈ যোৱাৰ বাবে নাই এটা সুচল পথ। মূল পথৰ পৰা এখন জৰাজীৰ্ণ বাঁহৰ দলং পাৰ হৈ প্ৰায় ১ কিলোমিটাৰতকৈ অধিক পথ খোজকাঢ়ি যাব লাগে তেওঁৰ ঘৰলৈ।
এই পথত দুচকীয়া বা চাৰিচকীয়া বাহন চলাচল কৰিব নোৱাৰাৰ দৰে সমস্যাৰ মাজতো ঋষিতাই নিজৰ অধ্যৱসায় আৰু পৰিশ্ৰমেৰে এই সফলতা অৰ্জন কৰিবলৈ সক্ষম হৈছে।
নামতি অঞ্চলত আনন্দৰ জোৱাৰ, উজ্জ্বল ভৱিষ্যতৰ শুভেচ্ছা
স্বস্তিকা বৰবৰা আৰু ঋষিতা বৰাৰ এই গৌৰৱময় সফলতাই নামতি অঞ্চলৰ লগতে শিৱসাগৰ আৰু চৰাইদেউ জিলাত আনন্দৰ পৰিৱেশ সৃষ্টি কৰিছে।
বিভিন্ন দল-সংগঠন, শিক্ষক সমাজ আৰু স্থানীয় ৰাইজে দুয়োগৰাকী প্ৰতিভাৱান ছাত্ৰীৰ সফলতাত গৌৰৱ প্ৰকাশ কৰাৰ লগতে আগন্তুক ৰাষ্ট্ৰীয় পৰ্যায়ৰ প্ৰদৰ্শনৰ বাবে আন্তৰিক শুভেচ্ছা জ্ঞাপন কৰিছে।
নামতিৰ এই দুই কন্যাৰ সফলতাই প্ৰমাণ কৰিছে যে দৃঢ় ইচ্ছাশক্তি, অধ্যৱসায় আৰু আত্মবিশ্বাস থাকিলে যিকোনো প্ৰত্যাহ্বান অতিক্ৰম কৰি সফলতাৰ পথত আগবাঢ়িব পাৰি।
