যোৰহাটত কংগ্ৰেছৰ শক্তি প্ৰদৰ্শন : বিধানসভা নিৰ্বাচনত পৰাজয়ৰ কাৰণ পৰ্যালোচনা, সংগঠন শক্তিশালীকৰণত জোৰ কংগ্ৰেছৰ

যোৰহাট, ২৩ মে’ : উজনি অসমৰ ৰাজনৈতিক পৰিৱেশৰ মাজতে শুকুৰবাৰে যোৰহাট জিলা কংগ্ৰেছ কাৰ্যালয়ত অনুষ্ঠিত কংগ্ৰেছৰ এক গুৰুত্বপূৰ্ণ পৰ্যালোচনা সভাই ৰাজনৈতিক মহলত বিশেষ চৰ্চা লাভ কৰে। লোকসভাৰ সাংসদ তথা প্ৰদেশ কংগ্ৰেছ সভাপতি গৌৰৱ গগৈৰ উপস্থিতিত অনুষ্ঠিত হোৱা এই সভাত সংগঠন শক্তিশালী কৰা, আগন্তুক ৰাজনৈতিক কৌশল নিৰ্ধাৰণ আৰু ৰাজ্য তথা কেন্দ্ৰীয় চৰকাৰৰ নীতিৰ বিৰুদ্ধে গণআন্দোলন গঢ়ি তোলাৰ বিষয়ত বিস্তৃত আলোচনা অনুষ্ঠিত হয়।

সভাত কংগ্ৰেছ নেতাসকলে স্মাৰ্ট মিটাৰ, পৌৰসভাৰ দুৰ্বল ব্যৱস্থা, নগৰৰ জৰাজীৰ্ণ পানী নিষ্কাশন ব্যৱস্থা, মূল্যবৃদ্ধি, নিবনুৱা সমস্যা, পেট্ৰ’ল-ডিজেলৰ মূল্যবৃদ্ধি, মত প্ৰকাশৰ স্বাধীনতা আৰু আন্তঃৰাষ্ট্ৰীয় পৰিস্থিতি আদি বহু গুৰুত্বপূৰ্ণ বিষয়ক লৈ চৰকাৰক তীব্ৰ সমালোচনা কৰে। জিলা আৰু ব্লক পৰ্যায়ৰ বহু পদাধিকাৰী, কৰ্মী আৰু সমৰ্থক সভাত উপস্থিত থাকে।

সভাৰ আটাইতকৈ গুৰুত্বপূৰ্ণ দিশ আছিল সদ্য সমাপ্ত বিধানসভা নিৰ্বাচনত কংগ্ৰেছৰ ভয়াবহ পৰাজয়ৰ কাৰণসমূহৰ পৰ্যালোচনা। দলীয় নেতাসকলে নিৰ্বাচনী ফলাফলৰ পিছত সাংগঠনিক দুৰ্বলতা, বুথ পৰ্যায়ৰ সীমাবদ্ধতা, কৰ্মীসকলৰ মাজত সমন্বয়ৰ অভাৱ আৰু জনসাধাৰণৰ মাজত শক্তিশালীভাৱে প্ৰৱেশ কৰিব নোৱাৰা আদি বিষয়ত গভীৰ আত্মসমালোচনা আৰু মন্থন কৰে।

সভাত এই বিষয়টোও উত্থাপিত হয় যে বহু সমষ্টিত কংগ্ৰেছে জনসমৰ্থন ভোটত ৰূপান্তৰিত কৰিব নোৱাৰিলে। নেতাসকলে স্বীকাৰ কৰে যে সংগঠনক তৃণমূল পৰ্যায়ত অধিক শক্তিশালী কৰাৰ প্ৰয়োজন আছে। বুথ ব্যৱস্থাপনা, যুৱ কৰ্মীৰ অংশগ্ৰহণ আৰু গ্ৰাম্যাঞ্চলত গণসংযোগ অভিযান অধিক তীব্ৰ কৰাৰ ওপৰত বিশেষ গুৰুত্ব আৰোপ কৰা হয়।

ৰাজনৈতিক দৃষ্টিকোণৰ পৰা এই বিষয়টোকো বিশেষ তাৎপৰ্যপূর্ণ বুলি ধৰা হৈছে যে প্ৰদেশ কংগ্ৰেছ সভাপতি তথা যোৰহাট লোকসভা সমষ্টিৰ বৰ্তমানৰ সাংসদ গৌৰৱ গগৈ নিজেও যোৰহাট সদৰ বিধানসভা সমষ্টিৰ পৰা নিৰ্বাচনত পৰাজিত হৈছিল। সভাত এই পৰাজয়ৰ ৰাজনৈতিক কাৰণ, স্থানীয় সমীকৰণ, সাংগঠনিক সীমাবদ্ধতা আৰু নিৰ্বাচনী কৌশলৰ ওপৰতো বিস্তৃত আলোচনা কৰা হয়। দলীয় নেতাসকলে ভৱিষ্যতে এনে পৰিস্থিতিৰ পুনৰাবৃত্তি ৰোধ কৰিবলৈ সংগঠনক অধিক সক্ৰিয় আৰু সুসংগঠিত কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে।

সভাত ভাষণ প্ৰদান কৰি গৌৰৱ গগৈয়ে কয় যে কংগ্ৰেছ দলে সদায় জনসাধাৰণৰ সমস্যা আৰু দাবীৰ পক্ষত সংগ্ৰাম কৰি আহিছে আৰু আগলৈও জনতাৰ কণ্ঠস্বৰ শক্তিশালীভাৱে উত্থাপন কৰি যাব। তেওঁ কয় যে যোৰহাটসহ সমগ্ৰ অসমত সাধাৰণ ৰাইজ বিভিন্ন সমস্যাত জৰ্জৰিত হৈ আছে, কিন্তু চৰকাৰে মূল সমস্যাৰ পৰা দৃষ্টি আঁতৰাবলৈ চেষ্টা চলাই আছে।

তেওঁ কয় যে সভাত বিশেষভাৱে যোৰহাট নগৰাঞ্চলৰ সমস্যাসমূহৰ পৰ্যালোচনা কৰা হয়। নগৰত পানী নিষ্কাশন ব্যৱস্থাৰ অৱস্থা দিনে দিনে অধিক বেয়া হৈ পৰিছে, ফলত সামান্য বৰষুণতে বহু অঞ্চলত জলাবদ্ধতাৰ সৃষ্টি হয়। বৰষুণৰ পানী নিষ্কাশনৰ ব্যৱস্থা প্ৰায় অচল হৈ পৰিছে আৰু পৌৰসভাৰ হাতত পৰ্যাপ্ত আৰ্থিক সম্পদ নথকাৰ ফলত সমস্যাৰ সমাধান সম্ভৱ হোৱা নাই।

কংগ্ৰেছ নেতাসকলে অভিযোগ কৰে যে পৌৰকৰ সংগ্ৰহৰ ক্ষেত্ৰত সাধাৰণ ৰাইজৰ ওপৰত চাপ প্ৰয়োগ কৰা হৈছে, অথচ মৌলিক নাগৰিক সুবিধা প্ৰদানত প্ৰশাসন সম্পূৰ্ণ ব্যৰ্থ হৈছে। নগৰৰ বহু অঞ্চলত পথ, নলা, পৰিষ্কাৰ-পৰিচ্ছন্নতা আৰু খোৱাপানীৰ ব্যৱস্থা অতি চিন্তাজনক অৱস্থাত আছে বুলি তেওঁলোকে উল্লেখ কৰে।

সভাত গ্ৰামাঞ্চলত সংস্থাপন কৰা স্মাৰ্ট মিটাৰক লৈও ব্যাপক আলোচনা হয়। নেতাসকলে কয় যে স্মাৰ্ট মিটাৰ সংস্থাপনৰ পিছত বহু গ্ৰাহকৰ বিদ্যুৎ বিল অস্বাভাৱিকভাৱে বৃদ্ধি পোৱাৰ অভিযোগ উত্থাপিত হৈছে। বহু গ্ৰাহকে কাৰিকৰী সমস্যাৰ লগতে ভুল বিল নিৰ্ধাৰণৰ সন্মুখীন হ’বলগীয়া হৈছে। কংগ্ৰেছে এই সমস্যাক গুৰুত্বসহকাৰে গ্ৰহণ কৰিছে আৰু আগন্তুক দিনত এই বিষয়ত আন্দোলন অধিক তীব্ৰ কৰা হ’ব বুলি নেতাসকলে স্পষ্ট কৰে।

সভাৰ সময়ছোৱাত বিজেপিৰ অভ্যন্তৰীণ মতবিৰোধক লৈও কংগ্ৰেছ নেতাসকলে তীব্ৰ আক্ৰমণ কৰে। তেওঁলোকে দাবী কৰে যে টীয়ক, তিতাবৰ আৰু যোৰহাট অঞ্চলত বিজেপি নেতাসকলৰ মাজত বহুদিন ধৰি অসন্তোষ আৰু গোটবাজি চলি আছে। বহু স্থানীয় বিজেপি নেতা আৰু কৰ্মী বৰ্তমানৰ ৰাজনৈতিক পৰিস্থিতিত অসন্তুষ্ট বুলি কংগ্ৰেছ নেতাসকলে অভিযোগ কৰে।

নেতাসকলে কয় যে সাম্প্ৰতিক সময়ত বিজেপি বিধায়ক আৰু স্থানীয় নেতাসকলৰ মাজত মতানৈক্য ইমান বৃদ্ধি পাইছিল যে ৰাজ্যিক নেতৃত্বকো বিষয়টোত হস্তক্ষেপ কৰিবলগীয়া হৈছিল। কংগ্ৰেছৰ মতে বিজেপিৰ ভিতৰত বৃদ্ধি পোৱা অসন্তোষৰ ৰাজনৈতিক প্ৰভাৱ আগন্তুক সময়ত স্পষ্টভাৱে দেখা যাব।

সভাত বিৰোধী শক্তিৰ ভূমিকাক অধিক শক্তিশালী কৰাৰ ওপৰতো বিশেষ গুৰুত্ব আৰোপ কৰা হয়। নেতাসকলে কয় যে কংগ্ৰেছে নিয়মিতভাৱে পৰ্যালোচনা সভাৰ জৰিয়তে সাংগঠনিক অৱস্থাৰ মূল্যায়ন কৰি আছে। বুথ পৰ্যায়ৰ পৰা জিলা পৰ্যায়লৈ সংগঠন সক্ৰিয় কৰাৰ কৌশল গ্ৰহণ কৰা হৈছে যাতে জনসাধাৰণৰ সমস্যাক লৈ চৰকাৰৰ ওপৰত অধিক চাপ সৃষ্টি কৰিব পৰা যায়।

কৰ্মীসকলক সম্বোধন কৰি নেতাসকলে কয় যে প্ৰতিজন কৰ্মীয়ে নিজৰ দায়িত্ব নিষ্ঠাৰে পালন কৰিব লাগিব আৰু জনসাধাৰণৰ মাজলৈ গৈ তেওঁলোকৰ সমস্যাসমূহ বুজিবলৈ চেষ্টা কৰিব লাগিব। আগন্তুক দিনত গণসংযোগ অভিযান, প্ৰতিবাদী কাৰ্যসূচী আৰু বিভিন্ন গণআন্দোলন অধিক তীব্ৰ কৰাৰ সংকেতো সভাৰ পৰা দিয়া হয়।

দেশৰ আৰ্থিক অৱস্থা আৰু মূল্যবৃদ্ধিৰ বিষয়টোও সভাত জোৰদাৰভাৱে উত্থাপিত হয়। পেট্ৰ’ল আৰু ডিজেলৰ মূল্যবৃদ্ধিক লৈ কেন্দ্ৰীয় চৰকাৰক সমালোচনা কৰি নেতাসকলে কয় যে সাধাৰণ মানুহৰ ওপৰত মূল্যবৃদ্ধিৰ বোজা ক্ৰমাৎ বৃদ্ধি পাইছে। ৰন্ধন গেছ, খাদ্য সামগ্ৰী আৰু নিত্য ব্যৱহাৰ্য বস্তুৰ মূল্যবৃদ্ধিয়ে মধ্যবিত্ত আৰু দৰিদ্ৰ পৰিয়ালসমূহক অধিক সংকটত পেলাইছে।

আন্তঃৰাষ্ট্ৰীয় পৰিস্থিতিৰ প্ৰসংগত নেতাসকলে কয় যে ইৰান আৰু আমেৰিকাৰ মাজত বৃদ্ধি পোৱা উত্তেজনাৰ প্ৰভাৱ বিশ্ব অৰ্থনীতিত পৰিছে আৰু ভাৰতো ইয়াৰ পৰা বাদ পৰিব নোৱাৰে। কংগ্ৰেছ নেতাসকলে দাবী কৰে যে দলীয় নেতা ৰাহুল গান্ধীয়ে আগতেই কেন্দ্ৰীয় চৰকাৰক সম্ভাব্য আৰ্থিক সংকটৰ বিষয়ে সতৰ্ক কৰিছিল, কিন্তু চৰকাৰে সময়মতে প্ৰয়োজনীয় প্ৰস্তুতি গ্ৰহণ নকৰিলে।

প্ৰধানমন্ত্ৰী নৰেন্দ্ৰ মোদীক সমালোচনা কৰি নেতাসকলে কয় যে বৰ্তমানৰ আন্তঃৰাষ্ট্ৰীয় সংকটৰ সময়ত কেন্দ্ৰীয় চৰকাৰৰ কৌশল অত্যন্ত দুৰ্বল যেন দেখা গৈছে। তেওঁলোকে আশংকা প্ৰকাশ কৰে যে আগন্তুক দিনত দেশৰ অৰ্থনীতিত আৰু অধিক চাপ সৃষ্টি হ’ব পাৰে।

সভাত মত প্ৰকাশৰ স্বাধীনতাৰ বিষয়টোও প্ৰধানভাৱে উত্থাপিত হয়। কংগ্ৰেছ নেতাসকলে অভিযোগ কৰে যে চৰকাৰৰ সমালোচনা কৰা ব্যক্তি আৰু বিৰোধী কণ্ঠস্বৰ দমন কৰাৰ চেষ্টা চলি আছে। সামাজিক মাধ্যমৰ একাউণ্ট বন্ধ কৰা, প্ৰতিবাদী কাৰ্যসূচীত আৰক্ষীৰ হস্তক্ষেপ আৰু বিৰোধী নেতাসকলক লক্ষ্য কৰি ব্যৱস্থা গ্ৰহণ কৰাৰ অভিযোগো উত্থাপন কৰা হয়।

নেতাসকলে কয় যে নিবনুৱা সমস্যা আৰু অৰ্থনৈতিক অনিশ্চয়তাক লৈ যুৱ সমাজৰ মাজত অসন্তোষ ক্ৰমাগতভাৱে বৃদ্ধি পাইছে। সামাজিক মাধ্যমত চৰকাৰ বিৰোধী প্ৰতিক্ৰিয়া অধিক দেখা গৈছে আৰু নতুন সামাজিক-ৰাজনৈতিক মঞ্চৰো উত্থান ঘটিছে। কংগ্ৰেছ নেতাসকলৰ মতে আগন্তুক সময়ত এই অসন্তোষে ৰাজনীতিত গুৰুত্বপূৰ্ণ প্ৰভাৱ পেলাব পাৰে।

সাংবাদিকসকলৰ প্ৰশ্নৰ উত্তৰত দলীয় কৰ্মীসকলে “চিপৰাং মৰা” ঘটনাক লৈও প্ৰতিক্ৰিয়া ব্যক্ত কৰে। তেওঁলোকে কয় যে দলটোৱে বিষয়টো গুৰুত্বসহকাৰে পৰ্যবেক্ষণ কৰি আছে আৰু জনমনৰ অনুভূতিক সন্মান জনাই উপযুক্ত ৰাজনৈতিক স্থিতি গ্ৰহণ কৰিব। যদিও এই বিষয়ত অধিক মন্তব্য কৰাৰ পৰা নেতাসকলে বিৰত থাকে।

সভাৰ অন্তত কংগ্ৰেছ নেতাসকলে কয় যে দলটোৱে ব্যাপক পৰ্যালোচনাৰ অংশ হিচাপে কৰ্মী, সমৰ্থক আৰু সাধাৰণ ৰাইজৰ মতামত সংগ্ৰহ অব্যাহত ৰাখিছে। সেই মতামতৰ ভিত্তিত আগন্তুক ৰাজনৈতিক কৌশল অধিক শক্তিশালী কৰা হ’ব। নেতাসকলে দাবী কৰে যে কংগ্ৰেছে আগন্তুক সময়ত জনসাধাৰণৰ সমস্যাক লৈ অধিক আগ্ৰাসী ভূমিকা গ্ৰহণ কৰিব আৰু ৰাজ্য তথা কেন্দ্ৰীয় চৰকাৰক জবাবদিহিতাৰ আওতালৈ আনিবলৈ চেষ্টা চলাব।