দুৰ্গা পূজাৰ বাবে সাজু নাজিৰা সমজিলা প্ৰশাসন—সুৰক্ষা, শৃংখলা আৰু বিসৰ্জনক লৈ কঠোৰ নিৰ্দেশনা : সমজিলা আয়ুক্ত প্ৰতিভা মেশ্ৰামৰ অধ্যক্ষতাত প্ৰস্তুতি বৈঠক—পূজা সমিতিসমূহক আগতীয়াকৈ অনুমতি সংগ্ৰহৰ নিৰ্দেশ : ১২ অক্টোবৰৰ ভিতৰত সেৱা সেঁতু প’ৰ্টেলত অনলাইন আবেদন বাধ্যতামূলক :  পূজা মণ্ডপত পৰ্যাপ্ত পোহৰ, অগ্নিনিৰ্বাপক সঁজুলি আৰু নিশাৰ সুৰক্ষাত বিশেষ গুৰুত্ব—সন্দেহজনক গতিবিধি দেখিলেই আৰক্ষীক জনোৱাৰ আহ্বান

নাজিৰা, ৩০ ছেপ্টেম্বৰ : সমাগত দুৰ্গা পূজা সুশৃংখল, নিৰাপদ আৰু শান্তিপূৰ্ণভাৱে উদযাপন কৰাৰ লক্ষ্যৰে নাজিৰা সমজিলা প্ৰশাসনে ব্যাপক প্ৰস্তুতি আৰম্ভ কৰিছে। এই উপলক্ষে নাজিৰা সমজিলা আয়ুক্ত প্ৰতিভা মেশ্ৰামৰ অধ্যক্ষতাত সমজিলা আয়ুক্তৰ কাৰ্যালয়ৰ সভাকক্ষত দুৰ্গা পূজাৰ প্ৰস্তুতি সন্দৰ্ভত এখন গুৰুত্বপূৰ্ণ বৈঠক অনুষ্ঠিত হয়। বৈঠকত বিভিন্ন বিভাগৰ বিষয়া আৰু পূজা সমিতিসমূহৰ প্ৰতিনিধিৰ উপস্থিতিত পূজাৰ সময়ছোৱাত গ্ৰহণ কৰিবলগীয়া সুৰক্ষা আৰু ব্যৱস্থাপনামূলক পদক্ষেপসমূহৰ ওপৰত বিস্তৃত আলোচনা কৰা হয়।

সুৰক্ষা, যান-বাহন আৰু পাৰ্কিং ব্যৱস্থাক লৈ আলোচনা

বৈঠকত দুৰ্গা পূজাৰ সময়ত সৰ্বসাধাৰণৰ সুৰক্ষা নিশ্চিত কৰা, পূজা উদযাপনৰ বাবে প্ৰয়োজনীয় অনুমতি সংগ্ৰহ, যান-বাহন চলাচল নিয়ন্ত্ৰণ, পাৰ্কিং ব্যৱস্থা, পূজা মণ্ডপসমূহৰ নিৰাপত্তা, পৰ্যাপ্ত পোহৰৰ ব্যৱস্থা, দুৰ্যোগ প্ৰতিৰোধী ব্যৱস্থাপনা আৰু প্ৰতিমা বিসৰ্জনৰ প্ৰক্ৰিয়াকে ধৰি বিভিন্ন গুৰুত্বপূৰ্ণ বিষয় আলোচনা কৰা হয়।

সভাৰ আৰম্ভণিতে বিগত বৰ্ষৰ কাৰ্যবিৱৰণী সহকাৰী আয়ুক্ত অৰুণাভ সোণোৱালে পাঠ কৰে। বিগত বৰ্ষৰ অভিজ্ঞতাৰ ভিত্তিত এইবাৰ পূজা উদযাপন অধিক সুশৃংখল আৰু নিৰাপদ কৰাৰ বাবে প্ৰয়োজনীয় পদক্ষেপ সন্দৰ্ভতো আলোচনা কৰা হয়।

সেৱা সেঁতুৰ জৰিয়তে আগতীয়াকৈ কৰিব লাগিব আবেদন

প্ৰশাসনে পূজা সমিতিসমূহক আগতীয়াকৈ অসম আৰক্ষীৰ সেৱা সেঁতু প’ৰ্টেলৰ জৰিয়তে অনলাইন আবেদন কৰাৰ লগতে সংশ্লিষ্ট বিভাগসমূহৰ পৰা সকলো প্ৰয়োজনীয় অনুমতি সংগ্ৰহ কৰিবলৈ নিৰ্দেশ দিয়ে।

সংশ্লিষ্ট বিভাগৰ পৰা প্ৰয়োজনীয় নথি-পত্ৰ সংগ্ৰহ কৰাৰ পাছত সেইসমূহ ১২ অক্টোবৰৰ ভিতৰত নাজিৰা সমজিলা আয়ুক্তৰ কাৰ্যালয়ত জমা দিবলৈ পূজা সমিতিসমূহক কোৱা হৈছে। প্ৰয়োজনীয় অনুমতি আৰু নথি-পত্ৰৰ ক্ষেত্ৰত যাতে কোনো ধৰণৰ গাফিলতি নহয়, তাৰ প্ৰতিও বিশেষ গুৰুত্ব আৰোপ কৰা হয়।

পূজা মণ্ডপত অগ্নিসুৰক্ষা আৰু পোহৰৰ পৰ্যাপ্ত ব্যৱস্থা

পূজা মণ্ডপ আৰু ইয়াৰ চৌপাশত পৰ্যাপ্ত পোহৰৰ ব্যৱস্থা নিশ্চিত কৰিবলৈ সমিতিসমূহক নিৰ্দেশ দিয়া হৈছে। একেদৰে অগ্নিকাণ্ডৰ দৰে জৰুৰীকালীন পৰিস্থিতিৰ মোকাবিলা কৰিব পৰাকৈ প্ৰয়োজনীয় অগ্নিনিৰ্বাপক সঁজুলি আৰু সামগ্ৰী পূজা মণ্ডপত যথাযথভাৱে মজুত ৰাখিব লাগিব।

পূজাৰ সময়ত বৃহৎ জনসমাগমৰ প্ৰতি লক্ষ্য ৰাখি জৰুৰী পৰিস্থিতিৰ সৃষ্টি হ’লে যাতে তৎক্ষণাত ব্যৱস্থা গ্ৰহণ কৰিব পৰা যায়, তাৰ বাবে আগতীয়াকৈ প্ৰয়োজনীয় প্ৰস্তুতি সম্পূৰ্ণ কৰি ৰাখিবলৈও সমিতিসমূহক কোৱা হয়।

সন্দেহজনক লোক বা গৰাকীবিহীন বেগ দেখিলেই আৰক্ষীক খবৰ

বৈঠকত আৰক্ষী, অগ্নিনিৰ্বাপক বাহিনী, জিলা দুৰ্যোগ ব্যৱস্থাপনাৰ নিয়ন্ত্ৰণ কক্ষ, এপিডিচিএল, অসামৰিক প্ৰতিৰক্ষা আৰু অসামৰিক চিকিৎসালয়কে ধৰি বিভিন্ন জৰুৰীকালীন সেৱাৰ যোগাযোগ নম্বৰ প্ৰশাসনক প্ৰদান কৰাৰ ব্যৱস্থা কৰিবলৈ কোৱা হয়।

পূজা মণ্ডপ বা ইয়াৰ আশে-পাশে পৰিত্যক্ত অথবা গৰাকীবিহীন বেগ, সন্দেহজনক ব্যক্তি বা কোনো অস্বাভাৱিক গতিবিধি পৰিলক্ষিত হ’লে তৎক্ষণাত আৰক্ষী বিভাগক অৱগত কৰিবলৈও আহ্বান জনোৱা হয়।

স্বেচ্ছাসেৱক নিয়োগ আৰু নিশাৰ সুৰক্ষাত বিশেষ গুৰুত্ব

প্ৰতিখন পূজা সমিতিক পৰ্যাপ্ত সংখ্যক স্বেচ্ছাসেৱক নিয়োগ কৰিবলৈ নিৰ্দেশ দিয়া হৈছে। স্বেচ্ছাসেৱকসকলক পূজাৰ পূৰ্বেই তেওঁলোকৰ নিজ নিজ দায়িত্ব সম্পৰ্কে স্পষ্টভাৱে অৱগত কৰিব লাগিব, যাতে ভিৰ নিয়ন্ত্ৰণ আৰু অন্যান্য ব্যৱস্থাপনা সুশৃংখলভাৱে সম্পন্ন কৰিব পৰা যায়।

ইয়াৰ লগতে নিশাৰ সময়ত পূজা মণ্ডপসমূহৰ সুৰক্ষাৰ বাবে প্ৰয়োজনীয় ব্যৱস্থা নিশ্চিত কৰিবলৈও সমিতিসমূহক নিৰ্দেশ দিয়া হয়।

প্ৰতিমা বিসৰ্জনত সাৱধানতা—নিৰ্ধাৰিত সময়ৰ ভিতৰত ঘাটত উপস্থিত হোৱাৰ নিৰ্দেশ

সমজিলা আয়ুক্ত প্ৰতিভা মেশ্ৰামে প্ৰতিমা বিসৰ্জনৰ সময়ত বিশেষ সাৱধানতা অৱলম্বন কৰিবলৈ পূজা সমিতিসমূহক আহ্বান জনায়। প্ৰতিমাসমূহ যাতে নিৰ্ধাৰিত সময়ৰ ভিতৰত বিসৰ্জন ঘাটত উপস্থিত হয় আৰু সুশৃংখলভাৱে বিসৰ্জন প্ৰক্ৰিয়া সম্পন্ন কৰা হয়, সেয়া নিশ্চিত কৰিবলৈ কোৱা হয়।

শান্তিপূৰ্ণ দুৰ্গা পূজাৰ বাবে সকলোৰে সহযোগিতা বিচাৰিলে প্ৰশাসনে

সমজিলা আয়ুক্তগৰাকীয়ে নাজিৰা সমজিলাত শান্তি-শৃংখলা অক্ষুণ্ণ ৰাখি সকলো চৰকাৰী নীতি-নিৰ্দেশনা যথাযথভাৱে পালন কৰাৰ ওপৰত গুৰুত্ব আৰোপ কৰে। আগন্তুক দুৰ্গা পূজা যাতে আনন্দমুখৰ, নিৰাপদ, সুশৃংখল আৰু শান্তিপূৰ্ণ পৰিৱেশত সফলতাৰে অনুষ্ঠিত হয়, তাৰ বাবে সংশ্লিষ্ট বিভাগ, পূজা সমিতি আৰু সৰ্বসাধাৰণ ৰাইজৰ সহায়-সহযোগিতা কামনা কৰে।

বৈঠকত সমজিলা আৰক্ষী অধীক্ষক লীলা বৰা, সহকাৰী আয়ুক্ত পৰ্চিয়া খনিকৰকে প্ৰমুখ্য কৰি বিভিন্ন সংশ্লিষ্ট বিভাগৰ বিষয়াসকলৰ লগতে নাজিৰা সমজিলাৰ বিভিন্ন পূজা সমিতিৰ বিষয়ববীয়াসকল উপস্থিত থাকে।