শ্ৰীমন্ত শংকৰদেৱৰ জন্মভূমি বটদ্ৰৱা থানত মাৰোৱাৰী সমাজৰ ঐতিহাসিক সেৱা : নগাঁও মাৰোৱাৰী সন্মিলনৰ মহিলা শাখাৰ উদ্যোগত ‘অমৃত ধাৰা’ শীতল খোৱাপানী সেৱাৰ শুভাৰম্ভ : হাজাৰ হাজাৰ ভক্ত, বৈষ্ণৱ আৰু তীৰ্থযাত্ৰীৰ সুবিধাৰ বাবে স্থাপন দুটা অত্যাধুনিক শীতল পানী মেচিন

নগাঁও, ৭ জুন : অসমৰ আধ্যাত্মিক, সাংস্কৃতিক আৰু বৈষ্ণৱ ঐতিহ্যৰ অন্যতম পৱিত্ৰ তীৰ্থক্ষেত্ৰ তথা মহাপুৰুষ শ্ৰীমন্ত শংকৰদেৱৰ জন্মস্থান বটদ্ৰৱা থানত আজি এক উল্লেখযোগ্য সামাজিক ধৰ্মীয় সেৱামূলক কাৰ্যসূচীৰ শুভাৰম্ভ কৰা হয়। নগাঁও মাৰোৱাৰী সন্মিলনৰ মহিলা শাখাৰ সৌজন্যত আৰু কেইবাগৰাকীও দাতা পৰিয়ালৰৰ সহযোগত ভকত বৈষ্ণৱ, সাধু-সন্ত, তীৰ্থযাত্ৰী আৰু সাধাৰণ দৰ্শনাৰ্থীৰ সুবিধাৰ্থে “অমৃত ধাৰা” শীৰ্ষক শীতল খোৱাপানী সেৱা আনুষ্ঠানিকভাৱে মুকলি কৰা হয়।

বটদ্ৰৱা থান পৰিচালনা সমিতিৰ কাৰ্যালয়ৰ সন্মুখত, মূল মন্দিৰলৈ যোৱা পথৰ কাষত স্থাপন কৰা এই দুটা অত্যাধুনিক শীতল পানী মেচিনৰ জৰিয়তে এতিয়াৰ পৰা প্ৰতিদিনে থানলৈ অহা হাজাৰ হাজাৰ ভক্তই বিনামূলীয়াকৈ বিশুদ্ধ আৰু শীতল পানী লাভ কৰিব। প্ৰচণ্ড গৰমৰ মাজত এই ব্যৱস্থাই বিশেষভাৱে উপকৃত কৰিব ৰাজ্যৰ লগতে দেশৰ বিভিন্ন প্ৰান্তৰ পৰা অহা তীৰ্থযাত্ৰীসকলক।

মাংগলিক পৰিৱেশত সম্পন্ন মুকলি অনুষ্ঠান

আজিৰ অনুষ্ঠানৰ আৰম্ভণি হয় বৈদিক মন্ত্রোচ্চাৰণ, নাম-প্ৰসঙ্গ, হৰিনাম সংকীৰ্তন আৰু মাংগলিক আচাৰ-অনুষ্ঠানেৰে। বটদ্ৰৱা থানৰ ভকতসকলে পৰম্পৰাগত বৈষ্ণৱ ৰীতি-নীতি অনুসৰি অনুষ্ঠানৰ শুভাৰম্ভ কৰে। হৰিধ্বনি আৰু নামঘোষাৰ ধ্বনিয়ে সমগ্ৰ পৰিৱেশক আধ্যাত্মিকতাৰে মুখৰিত কৰি তোলে।

এগছি বন্তি প্ৰজ্বলনৰ পাছত বটদ্ৰৱা থান পৰিচালনা সমিতিৰ কাৰ্যকৰী সভাপতি গোবিন চন্দ্ৰ দাসে “অমৃত ধাৰা” শীতল খোৱাপানী সেৱাৰ আনুষ্ঠানিক উদ্বোধন কৰে।

উদ্বোধনী ভাষণত তেওঁ কয় যে ভক্তৰ সেৱাই ভগৱানৰ প্ৰকৃত সেৱা। ধৰ্মীয় স্থানলৈ অহা তীৰ্থযাত্ৰী আৰু ভক্তসকলৰ সুবিধাৰ বাবে যিকোনো পদক্ষেপ অতি পুণ্যৰ কাম। মাৰোৱাৰী সন্মিলনৰ মহিলা শাখাই যি উদ্যোগ গ্ৰহণ কৰিছে, সেয়া নিঃসন্দেহে সমাজৰ বাবে এক অনুকৰণীয় উদাহৰণ। ভক্তক সেৱা কৰিলে ভগৱান নিজেই সন্তুষ্ট হয়। সেইবাবে ভক্তৰ সেৱাক ভক্তিৰ অন্যতম উচ্চ পথ বুলি গণ্য কৰা হয়।

মানৱ সেৱাই আমাৰ মূল লক্ষ্য : নিতু পোদ্দাৰ

অনুষ্ঠানত আদৰণি ভাষণ প্ৰদান কৰি নগাঁও মাৰোৱাৰী সন্মিলনৰ মহিলা শাখাৰ সভানেত্ৰী নিতু পোদ্দাৰে কয় যে, মাৰোৱাৰী সমাজে সদায় সমাজসেৱা, মানৱ কল্যাণ আৰু ধৰ্মীয় দায়বদ্ধতাৰ ক্ষেত্ৰত অগ্ৰণী ভূমিকা পালন কৰি আহিছে।

তেওঁ কয় যে বটদ্ৰৱা থান কেৱল অসমবাসীৰেই নহয়, সমগ্ৰ ভাৰতৰ বৈষ্ণৱ সমাজৰ আস্থাৰ এক পৱিত্ৰ কেন্দ্ৰ। ইয়ালৈ প্ৰতিদিনে অসংখ্য ভক্ত আহে। তেওঁলোকৰ সুবিধাৰ্থে শীতল পানী সেৱা আৰম্ভ কৰিব পৰাটো আমাৰ বাবে গৌৰৱৰ বিষয়। এই সেৱা ভগৱানৰ চৰণত আমাৰ সৰু উপহাৰ।

তেওঁ অনুষ্ঠান সফল কৰাৰ ক্ষেত্ৰত বটদ্ৰৱা থান পৰিচালনা সমিতি, দাতাসকল, সমাজৰ সদস্যবৃন্দ আৰু উপস্থিত সকলোকে আন্তৰিক ধন্যবাদ জ্ঞাপন কৰে।

দুই পৰিয়ালৰ সৌজন্যত স্থাপন কৰা হয় দুটা শীতল পানী মেচিন

অনুষ্ঠানটোৰ এক বিশেষ আকৰ্ষণ আছিল যে, দুটা শীতল পানী মেচিন দুটা পৃথক পৰিয়ালে নিজৰ প্ৰয়াত পৰিয়ালবৰ্গৰ পৱিত্ৰ স্মৃতিত দান আগবঢ়ায়।

প্ৰথমটো মেচিন প্ৰয়াত হুলাস চন্দ্ৰ কানৈ আৰু কস্তুৰী দেৱী কানৈৰ স্মৃতিত তেওঁলোকৰ পুত্ৰ ৰাজু (ৰাজকুমাৰ) কানৈ, লীনা কানৈ আৰু পৌত্ৰ আগস্ত্য কানৈয়ে দান আগবঢ়ায়।

দ্বিতীয়টো মেচিন প্ৰয়াত শংকৰলাল পোদ্দাৰ আৰু ৰেখা দেৱী পোদ্দাৰৰ স্মৃতিত লাকী পোদ্দাৰ, ৰোশনী পোদ্দাৰ, হেয়াংশ পোদ্দাৰ আৰু হৰ্ষিকা পোদ্দাৰৰ সৌজন্যত স্থাপন কৰা হয়।

অনুষ্ঠানত উক্ত দাতা পৰিয়ালসমূহক ফুলাম গামোচা, সম্বৰ্ধনা-পত্ৰ আৰু স্মাৰক প্ৰদান কৰি বিশেষভাৱে সন্মান জনোৱা হয়।

থান পৰিচালনা সমিতিৰ প্ৰশংসা

বটদ্ৰৱা থান পৰিচালনা সমিতিৰ সহকাৰী সম্পাদক প্ৰাঞ্জল হাজৰিকাই মাৰোৱাৰী সন্মিলনৰ মহিলা শাখা আৰু দাতাসকলৰ এই মহৎ প্ৰচেষ্টাৰ শলাগ লৈ কয় যে এই উদ্যোগ সমাজসেৱা আৰু ধৰ্মীয় দায়বদ্ধতাৰ এক উৎকৃষ্ট নিদৰ্শন। আগন্তুক দিনত সকলো সামাজিক সংগঠন, দাতা আৰু স্থানীয় লোকসকলে একেলগে আগবাঢ়ি আহি বটদ্ৰৱা থানৰ উন্নয়ন আৰু ভক্তসকলৰ সুবিধা বৃদ্ধিৰ ক্ষেত্ৰত অধিক ভূমিকা গ্ৰহণ কৰিব লাগে।

ধনভৰালী বদন কলিতা আৰু কাৰ্যনিৰ্বাহক সদস্য ভাগ্যেন্দ্ৰ মহন্তইও এই পদক্ষেপৰ ভূয়সী প্ৰশংসা কৰে।

অতিথি আৰু বিশিষ্ট ব্যক্তিসকলক সম্বৰ্ধনা

অনুষ্ঠানত বটদ্ৰৱা থান পৰিচালনা সমিতিৰ বিষয়ববীয়াসকলৰ লগতে পূৰ্বোত্তৰ প্ৰদেশীয় মাৰোৱাৰী সন্মিলন আৰু বিভিন্ন শাখাৰ বিষয়ববীয়াসকলক ফুলাম গামোচাৰে সম্বৰ্ধনা জনোৱা হয়।

উপস্থিত বিশিষ্ট ব্যক্তিসকলৰ ভিতৰত আছিল—

পূৰ্বোত্তৰ প্ৰদেশীয় মাৰোৱাৰী সন্মিলনৰ প্ৰান্তীয় উপাধ্যক্ষ সঞ্জয় গড়োদিয়া, প্ৰান্তীয় সহায়ক মন্ত্ৰী বিকাশ আগৰৱালা, নগাঁও শাখাৰ সভাপতি প্ৰমোদ কোঠাৰী, চাপৰমুখ শাখাৰ সভাপতি সীতাৰাম আগৰৱালা, পৰামৰ্শদাতা ৰাধাৰমণ খাটোৱালা, সংগঠন মন্ত্ৰী দিলীপ আগৰৱালা, যুটীয়া সম্পাদক অৰুণ আগৰকাৰ, বটদ্ৰৱা থান পৰিচালনা সমিতিৰ কাৰ্যকৰী সভাপতি গোবিন চন্দ্ৰ দাস, সহকাৰী সম্পাদক প্ৰাঞ্জল হাজৰিকা, ধনভৰালী বদন কলিতা, ভাগ্যেন্দ্ৰ মহন্ত আদি।

ইয়াৰ উপৰিও মহিলা শাখাৰ সভানেত্ৰী নিতু পোদ্দাৰ, উপ-সভানেত্ৰী ৰিংকু গ্ৰীডা, সাধাৰণ সম্পাদিকা বিনীতা খাটোৱালা, কোষাধ্যক্ষ সঙ্গীতা দাশানী, যুটীয়া সম্পাদিকা কুসুম শেঠীয়া, সুমন বথ্ৰা, সৰলা ছন্দক, অনিতা আলমপুৰীয়া, সন্তোষ শৰ্মা, শৰ্মিলা মাহেশ্বৰী, ৰিতিকা মৌৰ, পূজা কেজৰিৱাল, জুহি মৌৰ, দীপিকা কানৈ, মঞ্জু শৰ্মা, ৰীতা কাৱৰা, লীনা কানৈ, পিংকি কানৈ, জয়াশ্ৰী বথ্ৰা আদি উপস্থিত থাকে।

অনুষ্ঠানত শতাধিক ভক্ত, সমাজকৰ্মী আৰু স্থানীয় লোক উপস্থিত থাকি কাৰ্যসূচীক সফল কৰি তোলে।

বটদ্ৰৱা থান : অসমৰ বৈষ্ণৱ সংস্কৃতিৰ পৱিত্ৰতম তীৰ্থক্ষেত্ৰ

বটদ্ৰৱা থান বা বৰদোৱা থান অসমীয়া জাতিৰ ধৰ্মীয়, সাংস্কৃতিক আৰু আধ্যাত্মিক ইতিহাসৰ এক অবিচ্ছেদ্য অংশ।

১৪৪৯ খ্ৰীষ্টাব্দত ইয়াতেই জন্মগ্ৰহণ কৰিছিল মহাপুৰুষ শ্ৰীমন্ত শংকৰদেৱে, যি কেৱল এজন ধৰ্মগুৰু নহয়, বৰং এজন সমাজ সংস্কাৰক, দাৰ্শনিক, সাহিত্যিক, নাট্যকাৰ, সংগীতজ্ঞ, চিত্ৰশিল্পী আৰু একশৰণ নামধৰ্মৰ প্ৰৱৰ্তক হিচাপে সমগ্ৰ ভাৰতত সমাদৃত।

বটদ্ৰৱাতেই তেওঁ শৈশৱ আৰু কৈশোৰ কাল অতিবাহিত কৰিছিল। ইয়াতেই তেওঁ নামঘৰ আৰু কীৰ্তনঘৰৰ ধাৰণা প্ৰতিষ্ঠা কৰি সমাজত সমতা, ভাতৃত্ববোধ আৰু আধ্যাত্মিক জাগৰণৰ বাণী প্ৰচাৰ কৰিছিল।

লক্ষ লক্ষ ভক্তৰ আস্থাৰ কেন্দ্ৰ

বৰ্তমান বটদ্ৰৱা থান কেৱল এটা ধৰ্মীয় স্থান নহয়; ই অসমীয়া জাতীয় চেতনা, বৈষ্ণৱ সংস্কৃতি আৰু সামাজিক ঐক্যৰ এক জীৱন্ত প্ৰতীক।

প্ৰতি বছৰে শংকৰদেৱ তিথি, জন্মোৎসৱ, ৰাস মহোৎসৱ, দৌল উৎসৱ, নাম-প্ৰসঙ্গ আৰু অন্যান্য ধৰ্মীয় অনুষ্ঠানত লক্ষাধিক ভক্তৰ সমাগম ঘটে।

অসমৰ লগতে অৰুণাচল প্ৰদেশ, মেঘালয়, পশ্চিমবংগ, বিহাৰ, উত্তৰ প্ৰদেশ, ৰাজস্থান, গুজৰাট আদি ৰাজ্যৰ পৰাও অসংখ্য ভক্ত ইয়ালৈ আহে।

পৰ্যটন আৰু সাংস্কৃতিক ঐতিহ্যৰ অন্যতম কেন্দ্ৰ

বটদ্ৰৱা থান অসম চৰকাৰৰ পৰ্যটন মানচিত্ৰতো এক গুৰুত্বপূৰ্ণ স্থান অধিকাৰ কৰি আছে। দেশ-বিদেশৰ পৰ্যটকে ইয়ালৈ আহি কেৱল ধৰ্মীয় দৰ্শনেই নকৰে, বৰং শংকৰদেৱে প্ৰতিষ্ঠা কৰা বৈষ্ণৱ সংস্কৃতি, সত্ৰীয়া পৰম্পৰা, নামঘৰ সংস্কৃতি আৰু অসমৰ আধ্যাত্মিক ঐতিহ্যকো নিকটৰ পৰা জানিব পাৰে।

এই পৱিত্ৰ ভূমি আজিও অসমীয়া সমাজৰ আধ্যাত্মিক শক্তি, সাংস্কৃতিক গৌৰৱ আৰু সামাজিক ঐক্যৰ অন্যতম প্ৰতীক হিচাপে পৰিগণিত।

‘অমৃত ধাৰা’ : সেৱা, ভক্তি আৰু মানৱতাৰ নতুন অধ্যায়

নগাঁও মাৰোৱাৰী সন্মিলনৰ মহিলা শাখাই আৰম্ভ কৰা “অমৃত ধাৰা” শীতল খোৱাপানী সেৱা কেৱল দুটা পানী মেচিন স্থাপনৰ কাৰ্যসূচী নহয়; ই হৈছে মানৱতা, ধৰ্মীয় দায়বদ্ধতা, সামাজিক সমন্বয় আৰু ভক্তসেৱাৰ এক উজ্জ্বল নিদৰ্শন।

মহাপুৰুষ শ্ৰীমন্ত শংকৰদেৱৰ জন্মভূমি বটদ্ৰৱা থানৰ দৰে পৱিত্ৰ তীৰ্থক্ষেত্ৰত ভক্তসকলৰ কল্যাণৰ বাবে গ্ৰহণ কৰা এই পদক্ষেপে আগন্তুক বহু বছৰ ধৰি হাজাৰ হাজাৰ লোকক উপকৃত কৰিব। লগতে সমাজসেৱাৰ ক্ষেত্ৰত নতুন প্ৰেৰণাও যোগাব।

এই কাৰ্যসূচীয়ে পুনৰবাৰ প্ৰমাণ কৰি দিলে যে সমাজ আৰু ধৰ্ম যেতিয়া জনকল্যাণৰ স্বাৰ্থত একেলগে আগবাঢ়ে, তেতিয়া প্ৰতিটো সেৱাই এক মহৎ পুণ্যযজ্ঞত পৰিণত হয়।